ဗုဒ္ဓလူဝင်စား

တစ်နေ့သ၌ စာရေးသူသည် အွန်လိုင်းပေါ်သို့ ရောက်ရှိနေရာ ပြည်ပမှ ဒါယိကာမတစ်ဦးက လျှောက်ထားလာပါသည်။
“အရှင်ဘုရား ဖြစ်ရပ်ဆန်းတွေတော့ ပေါ်လာပြန်ပြီဘုရား”….။
“ ဘာဖြစ်ရပ်ဆန်းတွေ ပေါ်နေတာလဲ” ဟုမေးရာ
“ အရှင်ဘုရား…အွန်လိုင်းပေါ်မှာ မဖတ်မိဘူးထင်ပါတယ်၊ တပည့်တော် လျှောက်ထားပါရစေဘုရား…” ။
“ ဆိုစမ်းပါဦး” ။
“ ဒီလိုအရှင်ဘုရားရဲ့… လွန်ခဲ့တဲ့နှစ်နှစ်လောက်က မြတ်စွာဘုရားအလောင်းတော် မွေးဖွားတော်မူခဲ့တဲ့ နိပေါလ်နိုင်ငံမှာ ဗုဒ္ဓလူဝင်စား ဆိုတဲ့ သတင်းဟာ ဟိုးလေးတကျော် ပြန့်သွားတယ်လေ ဘုရား”…..။
“ ဟုတ်တယ်လေ…..အဲဒါက အရင်က ဖြစ်ခဲ့တဲ့ ကိစ္စလေ ဖြစ်ပြီးပြီပဲ အခုဟာက ဘာဖြစ်ရပြန်တာတဲ့လဲ”…..။
“ အရှင်ဘုရား….အဲဒါပြောမလို့၊ အခု ဒီဗုဒ္ဓလူဝင်စားဆိုတာလေး ပြန်ပေါ်လာပြန်ပြီ ဆိုပြီး အွန်လိုင်းသတင်းတစ်ခုမှာ ဖတ်လိုက်ရပါတယ်ဘုရား…”။

စာရေးသူသည် အွန်လိုင်းပေါ်သို့တက်သည်ဆိုရာဝယ် ဆောင်းပါးများနှင့် နိုင်ငံတကာမှ မေးလာကြသည့် ဘာသာရေးနှင့်သက်ဆိုင်သည့် အမေးပြဿနာများကို ကိုယ့်ဝက်ဆိုက်တွင် ပြန်လည်၍ ဖြေကြားပေးနေရပေသည်။ ထို့ကြောင့်လည်း ယခုဖြစ်ပေါ်နေသည့် သတင်းကို မသိရသေးသည်မှာ မဆန်းပေ။ အင်တာနက်သတင်းတွင် ဖေါ်ထားသော ဖြစ်ရပ်ဆန်းမှာ…..
လွန်ခဲ့သည့် ၂၀၀၅ ခုနှစ်က မြတ်ဗုဒ္ဓအလောင်းတော် မွေးဖွားတော်မူရာ နိပေါလ်နိုင်ငံ Neejgad မြို့လေးတွင် ဗုဒ္ဓလူဝင်စားသည် ဆိုသည့် ရမ်း ဗဟာဒူး ဘွန်ဂျမ် (Ram Bahadur Bomjon) အမည်ရှိ သူငယ်လေးတစ်ယောက်ပေါ်ပေါက်ခဲ့ဖူးပါသည်။သူ၏အသက်မှာ (၁၈)ခန့် ရှိပြီဖြစ်ပြီး ပုံသဏ္ဍန် ပုံတွင်မြင်ရသည့်အတိုင်း ခေါင်းစုတ်ဖွားနှင့် ယခုခေတ်အနေဖြင့်ပြောလျှင် ဟစ်ဟော့ အဆိုတော်အလားထင်ရလောက် အောင် ဆံပင်များကား ရှုပ်ထွေးကောက်လိမ်၍ နေပေသည်။ အဆိုပါ “ဗုဒ္ဓသူငယ်လေး” (Buddha boy)သည် ရေမသောက်၊ အစာမစား မအိပ်စက်ဘဲ လနှင့်ချီကာ မလုပ်မရှား တရားထိုင်နိုင်ကြောင်း ပရိသတ်များက ပြောကြားကြသည်။ မျက်စိဖြင့် တတ်အပ်မြင်ရသူမရှိ။ တစ်နေ့သ၌ သောကြာနေ့ညပိုင်းကာလတစ်ခု၌ တောထွက်သွားသည်ဟု ဆို၏။
ထို ဗုဒ္ဓသူငယ်လေးသည်(ဗုဒ္ဓလူဝင်စား)သည် မြေအောက်ကျင်း၌ သုံးနှစ်ကြာသည်အထိ တရားကျင့်မည်ဖြစ်ကြောင်း ၂၀၀၇ ခုနှစ်၊မတ်လတွင် ပြောကြားခဲ့ပေမယ့်လည်း မကြာသေးမီ ယခုလစောစောပိုင်းက ပြန်ပေါ်လာခဲ့သည်။ မြေအောက်ကျင်းတွင် တရားကျင့်မည်ဟုဆိုသော်လည်း နှစ်ကြိမ်းတိုင်တိုင် ပြန်ပေါ်လာခဲ့သည်။ ယခုပြီးခဲ့တဲ့ သောကြာနေ့က တောထဲပြန်ဝင်သွားပြီဟု (အေအက်ဖ်ပီ)သတင်းက ဆိုပါသည်။
သူငယ်လေးဝင်သွားသည့် တောမှာ နိပေါလ်နိုင်ငံရဲ့ မြို့တော် ခတ္တမန္ဒူမြို့တော်မှ (၃၅.၅)မိုင် ဝေးသည်ဟု ဆိုပါသည်။ သည်ကောင်လေး၏ မိခင်နာမည်က မာယာဒေ၀ီ တာမန်(Maya Devi Tamang)ဖြစ်ပါသည်။
ထိုဖြစ်ရပ်ဆန်းတွင် ဗုဒ္ဓက လူဝင်စားသည်ဆိုသည်မှာ ဗုဒ္ဓ၀ါဒအရ လုံးဝမဖြစ်နိုင်ချေ။ သည်နေရာတွင် မြတ်ဗုဒ္ဓကို မဆိုထားနှင့် အဂ္ဂသာဝက၊ မဟာသာဝက၊ ပကတိသာဝက တို့သည် အာသဝေါကင်းကွာ ရဟန္တာဖြစ်တော်မူခဲ့ကြသည်။ ဘ၀အသစ်ဖြစ်စေတတ်သည့် တဏှာတရားကို အပြီးသတ်ပယ်သတ်ပြီးသူများ ဖြစ်ကြသောကြောင့် နောက်ဘ၀အသစ်ဖြစ်ရန် အကြောင်းလုံးဝမရှိတော့ချေ။ မေတ္တာသုတ်တွင် မိန့်တော်မူထားသည်မှာ “နဟိဇာတုဂဗ္ဘသေယျ ပုနရေတိ” အမိဝမ်းတွင် ဇာတိပဋိသန္ဓေ တစ်ဖန် ပြန်၍ မနေတော့ပြီ ဟုလည်း လာရှိပေသည်။ ထိုကဲ့သို့ အောက်ထစ်ဆုံး ပကတိသာဝက ရဟန္တာများတောင်မှ ပဋိသန္ဓေတစ်ဖန်မရှိလျှင် မြတ်ဗုဒ္ဓသည်ကား အဘယ်ဆိုဖွယ်ရာ ရှိတော့အံ့နည်း။
ဤအကြောင်းကို မသိသော (အသိခေါက်ခက် အ၀င်နက်သော) ဗုဒ္ဓဘာသာဆိုသူများက ထိုဗုဒ္ဓလူဝင်စားအား ဘုရားပွင့်ရန် တစ်ဖန်လူပြန်ဖြစ်လာပြီ ဟု ယုံကြည်နေကြသည်မှာ ၀မ်းနည်းဖွယ်ကောင်းလှပါသည်။ ဤသည်ကား အသိဥာဏ်မဲ့သည့် ယုံကြည်မှုများနှင့် သူများရောယောင် ကိုယ်လည်းရောယောင်ကာ သူများပါးစပ်ဖျား လမ်းဆုံးနေကြသည့် သူများက ထိုဗုဒ္ဓ၀င်စားဆိုသည့် သူငယ်အား တစ်ဆိတ်ကို တစ်အိတ်လုပ်ကာ ကျော်ကြားအောင်လည်း သတင်းတွေဖြန့်ထားခဲ့ကြသည်။
ထို ‘ဗုဒ္ဓချာတိတ်’ (Buddha boy) တောထဲသို့ဝင်ကာ ဆယ်လကြာသည်အထိ အစာရေစာမစားဘဲ ကျင့်သုံးခဲ့သည်ဆိုရာဝယ် ထိုသူငယ်ထွက်သွားသည်ဆိုသည့် တောထဲသို့ မည်သူမျှလည်း မလိုက်သည့်အတွက် ဆယ်လကြာသည်အထိ အစာရေစာမစားသည်ကို မည်သူမျှ မသိနိုင်။ တောထဲဆိုသည့်အတွက် သစ်ဥသစ်ဖုများ စားကာ အသက်ရှင်နေနိုင်သည်ကိုကား တောထဲကျင်လည်နေကြသည့် မုဆိုးများပင် သိနိုင်ပေသည်။ ဘာ့ကြောင့်ဆိုလျှင် အစာမစားဘဲ ဆယ်လမပြောနှင့် ဆယ်ရက်တောင်မှာ အသက်ရှင်ဖို့ရာ မလွယ်ကူလှပေ။
ဤသည်ကိုလည်း အဟုတ်ကြီးထင်ကာ လူအများ ကိုးကွယ်နေကြသည်မှာ အံ့သြစရာကောင်းလှပါသည်။
မြတ်စွာဘုရားအလောင်းတော် သိဒ္ဓတ္ထမင်းသားသည် ကဏ္ဍကမြင်းဖြင့် မောင်ဆံခေါ်ကာ အနောမာသောင်ကမ်းအရောက် ဆံတော်ကို ပယ်လိုက်သောအခါ ဦးခေါင်းတော်ဝယ် ဆံတော်၏ အရှည်သည် လက်နှစ်သက်မျှသာ ကျန်ရှိတော်မူခဲ့ပေသည်။ ထိုနောက် ဘုရားပွင့်တော်မူပြီးနောက် ပရိနိဗ္ဗာန်ပြုသည်အထိ ဦးခေါင်းတော်မှ ဆံပင်တော်သည် လက်နှစ်သက်ထက် လုံးဝမရှည်တော့ပေ။ သို့ဖြစ်ပါလျှက် ယခုအခါ ဗုဒ္ဓ၀င်စားဆိုသူ၏ ဦးခေါင်းထက်တွင် ဆံပင်များသည် ဂုတ်ဝဲပင်မက ပုခုံးအထိ ရှည်နေသည်ကို တွေ့ရသည့်အပြင် ထိုဆံပင်များသည် သူ၏ ဦးခေါင်းထက်တွက် ရှုပ်ထွေးပွေလီနေသည်မှာ မြင်ရသူအဖို့ ကြည်ညိုဖွယ်လုံးဝ မရှိပေ။
ဤသည်ကိုပင် ဘုရားပွင့်လာပြီဟုဆိုကာ ကိုးကွယ်နေကြပေသည်။ ထိုအထဲတွင် ဗုဒ္ဓဘာသာဝင်များ အများစုပါနေသည်မှာ ၀မ်းနည်း ရှက်ဖွယ်ကောင်းလှပါသည်။
မြတ်ဘုရားရှင်က ထိုကဲ့သို့ အစာရေစာမစားဘဲ အငတ်ခံ ကျင့်သုံးနေသည်မှာ မဂ္ဂင်ရှစ်ပါးအကျင့် မပါဘူးဆိုပါလျှင် အတ္ထကိလမထ အကျင့်ဟု ဓမ္မစကြာ သုတ်တော်တွင် အတိအလင်း မိန့်တော်မူထားသည်။ သို့ပါလျှက် ထိုအတ္ထကိလမထအကျင့် ကျင့်နေသည်ကို တကယ်အကျင့်မြတ်ဟုထင်ကာ အထင်ကြီးနေကြသည်။ ဖြစ်သင့်/မဖြစ်သင့်ဆိုသည်ကိုလည်း ကိုယ်ပိုင်ဥာဏ်ဖြင့် မတွေးတောဘဲ ခွေးဟောင်တိုင်း လိုက်ကြည့်ကြသည့် သဘောပင်ဖြစ်သည်။

ဓါတ်ပုံတွင်ပါသည့်အတိုင်း ညောင်ပင်အောက် တရားထိုင်တိုင်းသာ ဘုရားဟုဆိုလျှင် အိန္ဒိယပြည်က ညောင်ပင်အောက် အကြာကြီးထိုင်ကြသော ဆာဒူးကြီးများအားလုံး ဘုရားဖြစ်ချေတော့မည်။ဗုဒ္ဓလူဝင်စားသူငယ်၏ မယ်တော်အမည်သည်လည်း မာယာဖြစ်သည့်အတွက် ဗုဒ္ဓမယ်တော်၏ အမည်ဟု ပြောဆိုကာ ဘုရားဖြစ်နိုင်သည်ဟုလည်း ပြောကြသည်။ သည်လိုဆိုလျှင် မာယာအမည်ရှိ မိခင်တိုင်း၏ သားများသည်လည်း ဘုရားဖြစ်ပေးရမည် ဖြစ်နေသည်။
ဗုဒ္ဓလူဝင်စားသည် နေ့အခါတွင် ညောင်ပင်အရင်း၌ တစ်နေကုန် ထမင်းမစားဘဲ မလှုပ်မယှက်ထိုင်နေကာ ညနေ ၅ နာရီမှ မနက် ၅ နာရီအထိ၊ သူငယ်အနားနေသူလူတစ်စုက ကန့်လန့်ကာတွေကာထားပြီး သူငယ်အား လုံးဝတွေ့ခွင့်မရတော့ချေ။ ဤသည်မှာ သူတို့ရဲ့လိမ်ကွက်ဖြစ်မည်ဟုယူဆပ်ါသည်။ အဘယ်ကြောင့်နည်း နေ့ရောညပါ အစာမစားဟု အသံလွင့်ထားခဲ့ပေမယ့် လူအများ အနားကပ်ခွင့်မရသည့် ညဖက်တွင် မစားဟုမပြောနိုင်၊ စားချင်လည်း စားနိုင်သောကြောင့် ဖြစ်သည်။ ပြောလိုသည်မှာ နေ့ခါအစာမစားဘဲ ညောင်ပင်အောက် မလှုပ်မယှက်ထိုင်ပြီး ညအခါ လူအများနှင့်အတွေ့မခံရုံဖြင့် အကျင့်မြတ်ဟု ပြောနိုင်ပါမည်နည်း။ သည်အကျင့်ဖြင့် လောကလူအများကို မည်သို့ အကျိုးပြုနိင်ပါမည်နည်း။
အမှန်တကယ် အကျိုးရရှိနေကြသည်ကား ဗုဒ္ဓချာတိတ် ကို စောက်ရှောက်ပေးနေကြသော သူငယ်အနားက လူတစ်စုကတော့ ဗုဒ္ဓလူဝင်စားသူငယ်ကို အကြောင်းပြု၍ လာဘ်လာဘ ရွှင်နေကြသည်။ လက်ငင်းဒိဋ္ဌ အကျိုးရရှိနေကြသည်။
၂၀၀၅ ခုနှစ်၊နိုဝင်ဘာလမှာ တရားအားထုတ်ရာက ထလာပြီးနောက် ဗုဒ္ဓချာတိတ်က ပြောသည်မှာ…. “ လူတွေကို ပြောလိုက်ပါ ကျူပ်ကို ဗုဒ္ဓလို့မခေါ်ပါနဲ့။ ကျူပ်မှာ ဗုဒ္ဓရဲ့ဘုန်းတန်ခိုးတွေ မရှိသေးပါဘူး။ ကျူပ်မှာ ရင်ပိုချီ အဆင့်ပဲရှိပါသေးတယ်..”။(ရင်ပိုချီဆိုသည်မှာ တိဗက်မဟာယာန ဗုဒ္ဓဘာသာမှာသာ သုံးတဲ့စကားပါ ထေရ၀ါဒမှာမရှိချေ။)။ ဤသို့ ကာယကံရှင်သူငယ်ကိုယ်တိုင်က ဗုဒ္ဓ လို့မခေါ်ပါနှင့် ဟု ပြောနေပါသော်လည်း လောဘဇောကပ်နေကြသည့် လူအများခမျာမှာတော့ ဗုဒ္ဓ ဟု ယုံကြည်ကာ ကိုးကွယ်နေကြပေပြီ။ သည်လို မဟုတ်မှန်းသိလျှက် ကိုးကွယ်နေကြ ယုံကြည်နေကြခြင်းသည် လူအများက လောကီအလိုအားကြီးလွန်းသည့်အတွက် ဖြစ်လာရသည်ဟု ပြောရပေမည်။
လူငယ်က “ ရုပ်ဝါဒဟာ ဒီတိုင်းပြည်မှာ အကြောက်တရား၊ စိုးရိမ်ကြောင့်ကြမှုနဲ့ ပဋိပက္ခတွေကို သယ်ဆောင်လာတယ်။ လူတစ်ယောက်ဟာ ဘာသာတရားနဲ့ ဒဿနိကဗေဒကို သူ့ရဲ့ အတွင်းကျကျ ပျော်ရွှင်မှုအတွက် လိုက်နာသင့်တယ်” လို့ ပရိသတ်တွေကို ၁၅ မိနစ်ကြာ မိန့်ခွန်းပြောကြားသည်လို့လည်း အင်တာနက်သတင်းမှာ ဖတ်လိုက်ရပြန်ပါသည်။
အချူပ်ဆိုရသော် လောကတွင် ဖြစ်နိုင်၏ မဖြစ်နိုင်၏ဆိုသည်ကို ကိုယ်ပိုင်ဥာဏ်ဖြင့် စဉ်းစားဝေဖန်နိုင်ခွင့်ရှိပါလျှက် ကိုယ်ပိုင်ဥာဏ်ကို အသုံးမချဘဲ သူတစ်ပါး ပါးစပ်ဖျားတွင် လမ်းဆုံးက သူတစ်ပါး ပြောတိုင်းယုံကြည်နေကြသည်ကို စဉ်းစားတွေးခေါ်ဖို့ အချိန်တန်နေပါပြီ။ မြတ်စွာဘုရားကလည်း အတ္တာဟိ အတ္တနော နာထော မိမိသည်သာ အားအားရာ ဟု ဟောတော်မူခဲ့ပါသည်။ သည်လိုသာ မိမိ၏ အလိုကြီးမှုကို ရှေ့တန်းတင်နေကြမည်ဆိုပါလျှင် ထိုအလိုကြီးမှု၏ နိဂုံးသည်ကား အကျည်းတန်သည့် နိဂုံးဖြစ်သွားပေတော့မည် ဟု သတိပေးရင်း……


အမြင်မှန်ရကြပါစေ
ဦးကောဝိဒ(မြိတ်)
8.12.2008 ၊ 6း 56 AM