ဓါတ်တော် ပြဿနာပြန်လည်ဖြည့်စွက်ချက်

အမေး။ ။ဘုန်းဘုန်းဘုရား…..ဘုရားရှင်တို့ရဲ့ သာသနာတော် တစ်ခါကွယ်တိုင်း ကွယ်တိုင်းတွင် ဓာတ်တော်မွေတော်တို့ပါ ကွယ်တယ်ဆိုတာ မှန်ပါသလားဘုရား။ အကယ်၍ ကွယ်တယ်ဆိုလျှင် ရွှေတိဂုံဘုရားတွင် ဌာပနာထည့်သွင်းထားတဲ့ ရှေးဘုရားရှင်တို့ရဲ့ ဓာတ်တော်မွေတော်များကို ဘယ်လို ယူဆရပါ့မလဲ ရှင်းပြပေးတော်မူပါဘုရား။
အဖြေ။ ။ ဒီအကြောင်းကို မေးထားတာဟာ ဒီမေးခွန်းပါဆိုရင် လေးခုမြောက် ရှိသွားပါပြီ၊ ယခင်က မေးတာတွေကို မဖြေဆိုနိုင်ခဲ့ပါဘူး။ အထူးသဖြင့် အွန်လိုင်းပေါ်မှာ ပေါ်ပြူလာဖြစ်နေတဲ့ ဒီမေးခွန်းကို ကြိုးစားဖြေပါ့မယ်။ ဘုရားတစ်ဆူရဲ့ သာသနာကွယ်လျှင် ဘုရားရှင်ရဲ့ ဓါတ်တော်များလည်း ဓါတုပရိနိဗ္ဗာန် စံဝင်တော်မူတယ်လို့ ဆိုပါတယ်။ ဒါနဲ့ပတ်သက်ပြီး အင်္ဂုတ္တရာအဋ္ဌကထာမှာ တွေ့ရပါတယ်။

မြတ်စွာဘုရားရဲ့ ဓါတ်တော်များဟာ အချို့အရပ်ဒေသများမှာ ကိုးကွယ်ပူဇော်မှု မရှိကြတော့ရင် ဘုရားရှင်ရဲ့ အဓိဋ္ဌာန်စွမ်းအား လျော်စွာ ပူဇော်ကိုးကွယ်မှု ရရှိရာ အရပ်သို့ ကြွတော်မူကြလိမ့်မယ်။ သာသနာတော်ကုန်ဆုံးသောအခါ အရပ်ဒေသများစွာမှ ဓါတ်တော်များဟာ သီရိလင်္ကာ (သီဟိုဠ်ကျွန်း) မဟာစေတီသို့ စုပေါင်း ကြွတော်မူလာပြီးနောက် နာဂဒီပကျွန်း ရာဇာယတနစေတီတွင် တည်ပြီး မဟာဗောဓိမဏ္ဍိုင် ပလ္လင်တော်သို့ ဓါတ်တော်များ အကြွင်းအကျန်မရှိ အားလုံး ကြွတော်မူကြလိမ့်မယ်။
အဲဒီအခါ ဓါတ်တော်များ စုပေါင်းပြီး ၃၂ ပါးလက္ခဏာတော်အတိုင်း ဘုရားရှင်ရဲ့ ပုသဏ္ဍာန် ဖြစ်တော်မူကာ ရေမီးအစုံ တန်ခိုး ပြာဋိဟာများကို ပြပါလိမ့်မယ်။ ဒီဖြစ်ရပ်ကို လူအများ မဖူးမြင်ရပါ။ နတ်ဗြဟ္မာများသာ ဖူးတွေ့ရခြင်းဖြစ်ပါတယ် ။ အဲဒီနောက် ဓါတ်တော်များဟာ မုန်ညင်းစေ့ငယ်လောက်ကို မကျန်တော့ဘဲ တေဇောဓါတ်လောင်ကျွမ်းတော်မူပါလိမ့်မယ်။ တေဇောဓါတ်လောင်ကျွမ်းနေတဲ့အခိုက် မီးတောက်မီးလျှံများဟာ နတ်ပြည် ဗြဟ္မပြည်တိုင်အောင် ရောက်လိမ့်မယ် လို့ဆိုပါတယ်။(အံ၊ဋ္ဌ၊၁၊၇၀)
တစ်ဖန် ဘုရားသာသနာကွယ်လျှင် ဓါတ်တော်များ အကြွင်းအကျန်မရှိတော့ဘဲ ဓါတုပရိနိဗ္ဗာန်ဝင်စံမယ်ဆိုတဲ့ အကြောင်းဟာ သက်တမ်းတိုတဲ့ ဂေါတမမြတ်စွာဘုရားသာသနာတော် တစ်ခုသာလျှင်ဖြစ်တယ်လို့ မှတ်ယူရပါမယ်။ သက်တမ်းရှည်တော်မူကြသော ကကုသန်စတဲ့ ဘုရားရှင်များဟာ ဓါတ်တော် သီးခြား မကျန်ရစ်ပါဘူး။ တစ်လုံးတခဲတည်းဖြစ်တဲ့ ဘုရားရှင်ရဲ့ ရုပ်ကလာပ်တော်ကို ဌာပနာပြီး စေတီတည်ထားကြတယ်။ ဒီကမ္ဘာမြေကြီးအတွင်းမှာ ရှေးဘုရားရှင်များရဲ့ ရုပ်ကလာပ်တော် ဌာပနာထားတဲ့ စေတီများ ယုခုတိုင် မြေကြီးထဲမှာ တည်ရှိနေသေးတယ်ဆိုတာ ပိဋကတ်တော်မှတ်တမ်းမှာ လာရှိပါတယ်။ ဒီအကြောင်းကိုလည်း ပြည့်စုံအောင် ဖေါ်ပြပေးလိုက်ပါတယ်။
အခါတစ်ပါး မြတ်စွာဘုရားဟာ ဒေသစာရီကြွချီတော်မူတဲ့အခါ တောဒေယျရွာအနီး နတ်စဉ်တစ်ခုရဲ့နံဘေးမှာ သီတင်းသုံးနေပါတယ်။ အဲဒီအခါ မြတ်စွာဘုရားက မလှမ်းမကမ်းမှာ လယ်ထွန် နေတဲ့ ပုဏ္ဏားတစ်ယောက်ကို သွားခေါ်ပါ လို့ အရှင်အာနန္ဒာအား ခိုင်းတော်မူပါတယ်။ အရှင်အာနန္ဒာကလည်း လယ်ထွန်ပုဏ္ဏားကို ခေါ်လာပါတယ်။ အနီးရောက်တော့ ပုဏ္ဏားဟာ မြတ်စွာဘုရားကို မရှိခိုးဘဲ နတ်စဉ်ကို ရှိခိုးတယ်။ အဲဒီမှာ ဘုရားက “ အသင်ပုဏ္ဏား…ဒီနေရာကို ဘာကြောင့် ရှိခိုးတာလဲ” လို့ မေးတော်မူတော့ ပုဏ္ဏားက “ အရှင်ဘုရား….ဒီနေရာဟာ ရှေးဘိုးဘွားအစဉ်အဆက်က ပူဇော်ခဲ့တဲ့ နေရာဖြစ်တဲ့အတွက် ရှိခိုးတာပါ” လို့ ပြန်လျှောက်ပါတယ်။ ဒီအခါ ဘုရားရှင်က “ ဒီနေရာက ရှိခိုးသင့် ရှိခိုးထိုက်တဲ့နေရာဖြစ်တယ်။ ဘာကြောင့်လဲဆိုရင် ဒီနတ်စဉ်ရဲ့အောက် တည့်တည့်မှာ ကဿပဘုရားရှင်ရဲ့ရုပ်ကလာပ်တော်ကို ဌာပနာထားတဲ့ ရွှေစေတီကြီးတစ်ဆူရှိပါတယ်။ ဒီစေတီကြီးရဲ့ ဥာဏ်တော် တစ်ယူဇနာ ဥာဏ်တော်အမြင့်ရှိပါတယ်” လို့မိန့်တော်မူခဲ့ပါတယ်။ ဒါနဲ့စပ်ပြီး ပြောပါဦးမယ်
ကဿပဘုရားရှင် ပရိနိဗ္ဗာန်စံပြီးတဲ့နောက် မီးသဂြိုလ်မှု မပြုလုပ်ဘဲ ဘုရားရှင်ရဲ့ ရုပ်ကလာပ်တော်ကို ပုံမပျက်စေဘဲ ရွှေစေတီတော်ထဲမှာ ဌာပနာထားတယ်ဆိုတာပဲ။ အဲဒါကို ဂေါတမမြတ်စွာဘုရားက ပုဏ္ဏားနှင့် ရောက်လာတဲ့ ပရိဿတ်တွေကို ဖူးမျှော်နိင် အောင် မြေကြီးထဲမှာ ယခုတိုင်တည်ရှိနေတဲ့ ကဿပဘုရားရဲ့ ရွှေစေတီတော်ကြီးရဲ့ ပုံတူကို ကောင်းကင်ပေါ်မှာ အဘိညာဉ်နဲ့ ဖန်ဆင်းပြတော်မူပါ တယ်။ (ဓမ္မပဒ၊ဋ္ဌ၊ဒု၊ ကဿပဒသဗလဿ သုဝဏ္ဏစေတိယ ၀တ္ထု)
အချူပ်ဆိုရရင် ဂေါတမမြတ်စွာဘုရားသာသနာတော် တစ်ခုသာလျှင် ဓါတုပရိနိဗ္ဗာန်စံဝင်ကာ ဓါတ်တော်များ လုံးဝမကျန်တော့ လို့ မှတ်ယူရမှာဖြစ်တယ်။ ဒါဖြင့် ရွှေတိဂုံစေတီမှာ ဌာပနာထားတဲ့ ဓါတ်တော်များကို ဘယ်လိုယူဆမလဲဆိုတာနှင့်ပတ်သက်ပြီး ရွှေတိဂုံစေတီတော်မှာ ဌာပနာထားတဲ့ အရာများမှာ ရှေးဘုရားရှင်တို့ရဲ့ တောင်ဝှေးတော်၊ရေသနုပ်တော်၊ ရေစစ်တော်ဆိုတဲ့ ပရိဘောဂ အသုံးအဆောင်များသာ ဖြစ်တယ်။ ဓါတ်တော်များ မဟုတ်ပါ၊ မြတ်စွာဘုရားရှင်တို့ရဲ့ တန်ခိုးတော်၊ ကမ္ဘာစောင့်နတ်မင်းကြီးများရဲ့ စောက်ရှောက်မှုတို့ကြောင့် ရှေးဘုရားရှင်တို့ရဲ့ တစ်လုံးတစ်ခဲတည်းဖြစ်တဲ့ ရုပ်ကလာပ်တော် ဓါတ်တော်များဟာ ကမ္ဘာတည်သမျှ တည်နေမှာ ဖြစ်ပါကြောင်း အဖြေပေးလိုက်ရပါတယ်။