ဓမ္မက္ခန္ဓာ-၈၄၀၀၀

အမေး။ ။ဘုန်းဘုန်းဘုရား….တပည့်တော် မရှင်းတာလေးတစ်ခုရှိလို့ မေးလျှောက်ပါရစေ။ မြတ်စွာဘုရားရှင် ဟောကြားတော်မူတဲ့ ဓမ္မက္ခန္ဓာပေါင်း(၈၄၀၀၀)ရှိတယ် လို့ ကြားဖူးပါတယ်။ ဘယ်အရာတွေကို ဓမ္မက္ခန္ဓာတွေ လို့ ခေါ်ခြင်းဖြစ်ပါသလဲဘုရား။ ဒီဓမ္မက္ခန္ဓာတစ်ခုစီ ဟာ နိဗ္ဗာန်ရောက်အောင် ပို့ဆောင်နိုင်စွမ်း ရှိပါသလားဘုရား။
ကျော်ဇင်လတ်(သုခရိပ်)
MePhi Universit, Mosscow

အဖြေ။ ။မောင်ကျော်ဇင်လတ်ရေ….ဘယ်အရာတွေကို ဓမ္မက္ခန္ဓာ လို့ခေါ်တာလဲ ဆိုရင် ဥပမာ ခန္ဓငါးပါးဆိုတာ အစုငါးပါးပါ။ ရူပက္ခန္ဓာ၊ဝေဒနက္ခန္ဓာ၊သညက္ခန္ဓာ၊သင်္ခါရက္ခန္ဓာ၊၀ိညာဏက္ခန္ဓာ = ရုပ်အစု ဝေဒနာအစု သညာအစု သင်္ခါရအစု ၀ိညာဏအစု ဆိုပြီး သူ့အစုလိုက်အစုလိုက်ရှိသလို တရားအစုတစ်ခုကို ဓမ္မက္ခန္ဓာတစ်ခု ဖြစ်တယ်။ မင်္ဂလသုတ်ထဲမှာ အသေ၀နာစ ဗာလာနံ၊ ပဏ္ဍိတာနဉ္စ သေ၀နံ။ ဆိုတဲ့ တရားတော်မှာ အသေ၀နာစ ဗာလာနံ = လူမိုက်ကို မပေါင်းရ ဆိုတာ ၀ါကျတစ်ကြောင်းပါ။ ဒီဝါကျတစ်ကြောင်းကိုပဲ ဓမ္မက္ခန္ဓာ တစ်ခု လို့ ခေါ်ပါတယ်။ ထို့အတူ ပဏ္ဍိတာနဉ္စ သေ၀နံ = ပညာရှိကို ပေါင်းသင်းရမယ် ဆိုတာလည်း ဓမ္မက္ခန္ဓာတစ်ခု လို့ ခေါ်ပါတယ်။ ဒါက သာမန်လူများ နားလည်အောင် အဖြေပေးရတာပါ။
ရှင်/ရဟန်းများအတွက် ဖြေရမယ်ဆိုရင်….
(ဧကာနုသန္ဓိကံ သုတ္တံ ဧကော ဓမ္မက္ခန္ဓော (ပေယျာလ) ဧ၀ံ ဓမ္မက္ခန္ဓ၀သေန စတုရာသီတိသဟဿာတိဝိဓံ ) ၀ိနည်းပါရာဇိကဏ်အဋ္ဌကထာမှာလာပါတယ်။
အဓိပ္ပါယ်က……သုတ္တန်မှာ အဆက်အစပ်စကား (အနုသန္ဓေ)တစ်ခုရှိတဲ့ သုတ်ဟာ ဓမ္မက္ခန္ဓာ တစ်ခု လို့ခေါ်တယ်။ အနုသန္ဓေများတဲ့ သုတ်မှာ အနုသေန္ဓေရဲ့အစွမ်းဖြင့် ဓမ္မက္ခန္ဓာအရေအတွက်ကို သိရပါမယ်။ ဂါထာဗန္ဓတို့မှာ အမေးပုစ္ဆာတစ်ခုသည် ဓမ္မက္ခန္ဓာ တစ်ခု ဖြစ်သလို အဖြေတစ်ခုဟာလည်း ဓမ္မက္ခန္ဓာတစ်ခု ဖြစ်တယ်။ အဘိဓမ္မာမှာ တိက် ဒုက် တို့ကို ဝေဖန်ထားခြင်းနှင့် တစ်ခုသောစိတ်အစုကို ဝေဖန်ထားတာတွေဟာ ဓမ္မက္ခန္ဓာတစ်ခု လို့ ခေါ်ပါတယ်။ ၀ိနည်းမှာ ၀တ္ထုကိုဖြစ်စေ၊ ခေါင်းစဉ် မာတိကာ ဖြစ်စေ၊ပုဒ်ကိုဝေဖန်ထားတဲ့ ပဒဘာဇနီကိုဖြစ်စေ၊ အကြားတွင် သင့်သောအာပတ် ဆိုတဲ့ အန္တရာပတ္တိကို ဖြစ်စေ၊ အာပတ်သင့်တဲ့ အလှည့်အကြိမ်ပေါင်းဆိုတဲ့ အာပတ္တိဝါရကို ဖြစ်စေ၊ အနာပတ္တိဝါရကိုဖြစ်စေ တိက်ကို ပိုင်းခြားခြင်းကိုဖြစ်စေ၊ ဒီအရာတွေမှာ တစ်ခုခုသော အစုကို ဓမ္မက္ခန္ဓာ တစ်ခုလို့ ခေါ်ဆိုရပါတယ်။
နောက်တစ်ခုက…..တရားတော်မှန်သမျှဟာ သစ္စာတရားမှ လွတ်တဲ့ တရားမရှိ လို့ ဟောတော်မူထားတဲ့အတွက် ဓမ္မက္ခန္ဓာ တစ်ခုဟာ နိဗ္ဗာန်ရောက်အောင် ပို့ဆောင်နိုင်ပါကြောင်း အဖြေပေးလိုက်ပါတယ်။