မျိုးဆက်သစ်တို့ရဲ့ဘာသာရေး
စာရေးသူတို့ကျောင်းမှာ ယဉ်ကျေးမှု သင်တန်းကျင်းပတာဟာ ယခုနှစ်ပါဆိုရင် ဒုတိယအကြိမ်ဖြစ်သွားပါပြီ။ ယခင်ဒီသင်တန်းကို စိတ်ကူးနဲ့ကျင်းပနေတာ ၅ နှစ်လောက်ရှိခဲ့ပြီ။ အကောင်အထည်မပေါ်ခဲ့ပါ။ ယခုမှ အကောင်အထည်ပေါ်တာ ၂-နှစ်လောက်ပဲ ရှိပါသေးတယ်။ အောင်မြင်မှုလဲ အသင့်အတင့်ရရှိခဲ့တယ်ဆိုပါတော့။ ယခင်နှစ်က သင်တန်းသား ၁၀၀-လောက်သာ လက်ခံနိုင်ခဲ့ပေမဲ့ ယခုနှစ်မှာတော့ သင်တန်းသူ/သား ၂၀၀ လောက် လက်ခံနိုင်ခဲ့တာကို ၀မ်းမြောက်ပီတိဖြစ်ရသူက စာရေးသူရယ်ပါ။
သင်တန်းဖွင့်ပွဲရက်မှာတော့ အခမ်းအနားကို အထွေအထူး မလုပ်ခဲ့ပါဘူး။ သာမဏေ၊သီလရှင်များ ပြုလုပ်ပေးကာ အရေးကြီးတဲ့သြဒ အချို့ကို ပြောဖြစ်ခဲ့ပါတယ်။ သင်တန်းဖွင့်တဲ့ရက်ကတော့ (၁.၃.၂၀၁၀) ညနေမှာဖြစ်ပါတယ်။ သင်တန်းသား/သူများရဲ့ မိဘများနဲ့ အထူးစည်ကား လှပါတယ်။ အခြေအနေကို အင်တာနက်ကနေ တစ်နာရီလောက် တိုက်ရိုက်လွင့်လိုက်ပါသေးတယ်။ နောက်တော့ လိုင်းကမကောင်းတာနဲ့ မလွင့်ဖြစ်ခဲ့တော့ဘူး။
အေးရိပ်ချောင်မဟာစည်ရိပ်သာမှာ ဒုတိယအကြိမ်မြောက် ဗုဒ္ဓဘာသာယဉ်ကျေးမှုအခြေခံသင်တန်း စတင်ခဲ့တာ ယနေ့ဆိုရင် ၅ ရက်မြောက်ရှိခဲ့ပါပြီ။ သင်တန်းသား/သူ သာမဏေ-သီလရှင်ရဲ့ ကျန်းမာရေးအတွက် ဆရာလေး ဒေါ်စန္ဒ၀တီ(Dr.စူးကျော်)၊ ကလေး အထူးကု ဆရာဝန်ကြီး ဒေါက်တာ ဒေါ်ချိုချိုဝင်း၊ ဓါတ်မှန်ပါရဂူ ဒေါက်တာသန္တာနီ၊ ဒေါက်တာ ဒေါ်ဇာဇာဝင်း တို့က တာဝန်ယူစောင့် ရှောက်ပေးစောင့်ရှောက်ပေး ခဲ့ကြပါတယ်။
တစ်နေ့ နေမကောင်းဖြစ်နေတဲ့အတွက် ဆေးလာပြတဲ့ သင်တန်းသူတစ်ဦးအား ကလေးအထူးကုဒေါက်တာဒေါ်ချိုချိုဝင်းက “ဆရာလေး….ရေခဲမုန့် စားပါလားဘုရား” လို့ မေးလိုက်ရာ “နေလွဲနေပြီမို့ ရေခဲ့မုန့်စားရင် ငရဲကြီးလိမ့်မယ်၊ မစားတော့ပါဘူး” လို့ သင်တန်းသူ တစ်ဦး ပြန်ပြောပါတယ်။ ကလေးအထူးကုပါရဂူ ဒေါက်တာချိုချိုက “ အရှင်ဘုရား….ဗုဒ္ဓဘာသာယဉ်ကျေးမှုသင်တန်းက ကလေးတွေအတွက် အလွန်တန်ဘိုးရှိတာပါပဲဘုရား၊ တပည့်တော်တို့ ငယ်ငယ်က ဘာသာရေးနဲ့ပတ်သက်တဲ့ ဒီလိုသင်တန်းမျိုး မတက်ခဲ့ဖူးပါဘူးဘုရား” လို့ ယဉ်ကျေးမှုသင်တန်းအကျိုးကြီးပုံကို အားပါးတရ လျှောက်ထားလာပါတယ်။
မှန်ပါတယ်။ ယနေ့ခေတ် မြန်မာနိင်ငံသာမက ပြည်ပနိုင်ငံများပါမကျန် ကလေးများကို ဘာသာရေးအခြေခံလေးတွေ သူတို့နှလုံးသား မှာ ကိန်းအောင်းသွားအောင် မျိုးစေ့ချပေးဖို့ လိုအပ်လှပါတယ်။
ညနေဖက် ဧည့်တွေ့ချိန်မှာ ဒကာမတစ်ဦးက သူ့သားကိုရင်ကို သတ်မှတ်ထားတဲ့နေရာမှာ လာရောက်တွေ့ဆုံပါတယ်။ အမေက သား ကိုရင်ကို တွေ့ပြီး အကြာကြီးစကားပြောမယ်လို့ အားခဲပြီးလာခဲ့တာပါ။ ဒါပေမဲ့ ကိုရင်နဲ့တွေ့တဲ့အခါမှာတော့ စကားအနည်းငယ်ပြောပြီးတဲ့အခါ မှာ “ဒကာမကြီး…..ပြောလို့ပြီးတယ်ဆိုရင် ကိုရင်သွားတော့မယ်” လို့ ကိုရင်က သူ့အမေကို ပြောလိုက်တော့ အမေ့ခမျာ စကားတအားပြောမယ် ဆိုပြီး အားခဲလာတာ၊ အခုတော့ သားဖြစ်သူရဲ့ စိမ်းကားတဲ့အဖြစ်ကို မြင်လိုက်ရတဲ့အတွက် ၀မ်းနည်းလာတယ်လို့ ဒကာမကြီးရဲ့ ခံစားချက်ကို ပြောပြပါတယ်။
ပြောလိုတာက သင်တန်းသား-သူလေးတွေဟာ သင်တန်းမှာပဲ မသိသေးတဲ့ဘာသာရေးစာပေများကို သင်ကြားရသလို သူငယ်ချင်း အသစ်များနဲ့လဲ ဆုံစည်းရတော့ သင်တန်းမှာ အပျော်ကြီးပျော်နေကြတာဖြစ်တယ်။
ညနေဖက် ဆေးခန်းပြချိန်မှာ ညနေ ၅ နာရီမှ ၆ နာရီအထိ ဖြစ်တယ်။တစ်ရက်ညနေမှာ သင်တန်းသား/သူလေးတွေကို ဆရာမများက ဦးဆောင်ပြီး ဆေးခန်းပြဖို့ ခေါ်လာကြတယ်။ ညနေဖက်ဆိုတော့ ဆေးစားတဲ့အခါမှာ အစာကို အရင်စားပီးမှ စားရမှာဆိုတော့ ဆရာဝန်က ကိတ်မုန့်စားပြီးမှ ဆေးစားဖို့ရာပြောတော့ “သမီးတို့ သီလယူထားတယ်၊ ညနေဖက်မှာ ဘာမှစားလို့မရပါဘူး” ဆိုပြီး တုံ့ပြန်အသံကို ကြားလိုက်ရ ပါတယ်။
ဝိကာလဘောဇနသိက္ခာပုဒ်နဲ့ပတ်သက်ပြီး သင်တန်းသားလေးများရဲ့ အတုယူအားကျဖွယ်ရာအချို့ကို တင်ပြလိုပါသေးတယ်။ တစ်နေ့ ဒကာမကြီးတစ်ဦး စာရေးသူထံရောက်လာပြီး “အရှင်ဘုရား…..တပည့်တော်မသမီးကို ညနေဖက် ဗိုက်ဆာနေမှာစိုးလို့ သကြားလုံးပေး လိုက်ပါတယ်။ ဖြစ်ချင်တော့ သကြားလုံးထဲမှာ ချော့ကလစ်တွေပါနေပါတယ်။ ဒါကိုပဲ သကြားလုံးမှာ ချောကလစ်ပါနေတယ်။ စားလို့မဘူး ဆိုပြီး တပည့်တော်အား ပြောလာပါတယ်။ တပည့်တော် အံ့သြလိုက်တာဘုရား၊ ကလေးတွေ အရွယ်နဲ့မလိုက်အောင်ပဲ သီလစောင့်ထိန်းနေတာ အံ့သြ ဖို့ကောင်းသလို ကြည်နူးမှုအပြည့်နဲ့ ပီတိတွေဖြာဝေခဲ့ရပါတယ်ဘုရာ။ ရှင်းရှင်းပြောရရင် တပည့်တော်တို့ တရားအားထုတ်တဲ့အခါတုန်းက ညနေဖက် ဗိုက်ဆာလို့ မုန့်တွေ ခိုးစားခဲ့ပါသေးတယ်ဘုရား” လို့ ပြောလာပါတယ်။ အော်…….ဒါဆိုရင် လူကြီးတွေက သမီးထက်ငယ်တဲ့ မေမေတွေ ဖြစ်ကုန်ပီပေါ့……….။
ဒီအကြောင်းကြားရပြန်တော့လဲ ထပ်ဆင့်ပီတိဖြာဝေခဲ့ရသူက စာရေးသူရယ်ပါ။ ဒီသင်တန်း အောင်မြင်အောင် အဖက်ဖက်က ကြောင့်ကြစိုက်ခဲ့ရလို့ ပင်ပမ်းမှုများစွာဖြစ်နေပေမဲ့ ကြည်နူးမှုပီတီတွေဖြစ်လာတဲ့အခါမှာ အမေပြောတဲ့ အမောပြေဆိုသလိုပဲ အမောကို ပြေသွား တော့တာပဲ၊ ပင်ပမ်းတာတွေလဲ ဘယ်ရောက်ကုန်တယ်မသိ။
ကလေးတွေကို ဗုဒ္ဓဘာသာယဉ်ကျေးမှု မျိုးစေ့ချပေးရတာဟာ မွန်မြတ်တဲ့လုပ်ငန်းဖြစ်သလို တန်ဖိုးမဖြတ်နိုင်တဲ့ သာသနာပြုလုပ်ငန်း တစ်ခုပါ။
သင်တန်းသားတစ်ဦးက “ကိုးကွယ်မှုပိုင်းဆိုင်ရာမှာ တကယ်တမ်းကိုးကွယ်သင့် ကိုးကွယ်ထိုက် တာတွေကို နည်းစနစ်မှန်ကန်စွာ ကိုးကွယ်တတ်အောင်သင်ပေးပါတယ်။ ကိုးကွယ်သင့်တယ်လို့ လူကြီးတွေက ယူဆထားတဲ့ ဘိုးဘိုးကြီး၊ဘိုးမင်းခေါင်၊ဘိုးဘိုးအောင်၊ မနဲလေး၊ ၃၇-မင်းနတ်စတဲ့ ပုဂ္ဂိုလ်တွေကို မကိုးကွယ်သင့်ကြောင်း သင်ပေးကြပါတယ်။ ကလေးတွေဟာ ဘာသာရေးနဲ့ပတ်သက်ပြီး သင်ပေးတာတွေကို ကြားရပြန်တော့ အိမ်မှာလူကြီးတွေ ကိုးကွယ်ပသနေကြတဲ့ ဆိုင်ရာ အကိုးကွယ်ခံတွေဟာ ကိုးကွယ်မှုအစစ် မဟုတ်ဘူး ဆိုတာ သိလာရပါတယ်။
ပိဋကတ်သုံးပုံစောင့်တာ သူရဿတီမယ်တော်လို့ လူကြီးတွေပြောကြပါတယ်။ တကယ်တော့ ပိဋကတ်သုံးပုံကို ဘုရားသားတော် သံဃာတော်များကသာ အခေတ်အဆက်ဆက် ထိန်းသိမ်းလာခဲ့ပါတယ်။ ဒါကိုသိလာရတော့ လူကြီးတွေ ကိုးကွယ်နေတဲ့သူရဿတီ မယ်တော်ဟာ ကိုးကွယ်သင့်တဲ့ အရာတစ်ခု မဟုတ်တာကို သိလာရပါတယ်။
တစ်နေ့ ဧည့်တွေ့ချိန်မှာ သားကိုရင်က “ မေမေ…………သားတို့ သေမင်းစာမေးပွဲကို နေ့တိုင်းဖြေနေကြရတယ်” လို့ အမေအဖေအား ပြောတော့ အမေက “ကိုရင်ရယ်………ကြားပဲကြားဖူးပေါင်ကွယ်… သေမင်းစာမေးပွဲလို့ ကိုရင်ပြောမှပဲ ကြားဖူးတော့တယ်” “ပီးတော့ရှိသေးတယ်၊ သားတို့ကျောင်းမှာစာမေးပွဲဖြေတော့ မြန်မာစာဘာသာ၊သင်္ချာဘာသာစတာတွေကိုဖြေရသလိုပဲ သေမင်းစာမေးပွဲမှာလဲ ကုသိုလ်ဘာသာတွေ ဖြေဆိုနေကြတယ်၊ သားတို့မှာ တကယ်လို့ မကောင်းတာကို ပြောမိ လုပ်မိ တွေးမိရင် အကုသိုလ်ဖြစ်တဲ့အတွက် စာမေးပွဲကျပါတယ်၊ကောင်းတာကို ပြောမိ လုပ်မိ တွေးမိတယ်ဆိုရင်တော့ ကုသိုလ်ဖြစ်တဲ့အတွက် စာပေးပွဲအောင်တယ် အမေရဲ့၊ ဖြေဆိုနေရတဲ့ကုသိုလ်ဘာသာက ဆယ်ဘာသာတောင်ရှိတယ်အမေရဲ့၊ ဒီအထဲမှာ သားအကြိုက်ဆုံးဘာသာကို ပြောရရင် အချောင်ရတဲ့ကုသိုလ်လေ” သားကိုရင်ရဲ့ စကားလုံးဆန်းကြောင့် အဖေအမေက “ကုသိုလ်ထဲမှာလဲ အချောင်ရတဲ့ကုသိုလ်ရှိသေးလားသားရဲ့ အမေတို့ကိုပြောပြပါအုံး” ဆိုတော့ သားကိုရင်က “ ပြောပါ့မယ်အမေရဲ့….အချောင်ကုသိုလ်ဆိုတာ သားထက်ဂုဏ်အားဖြင့် ကြီးမားကြတဲ့ လူကြီးဆရာမိဘများအရှေ့ရောက်ရင် ခေါင်းငုံ့ပြီးဖြေးဖြေးသွားတာတို့၊ ရဟန်းသံဃာများရဲ့အနားကသွားရင် လက်အုပ်ချီပြီးသွားတာတို့လေ…၊ ဒီထက်ရှင်းအောင်ပြောရရင် ကြီးသူကို ငယ်သူက ရိုသေလိုက်တာနဲ့ ငယ်ရွယ်သူမှာ ကုသိုလ်ရသွားတယ်၊ ဒီကုသိုလ်ရဲ့နာမည်က အပစာယနကုသိုလ်လို့ ခေါ်ပါတယ်။ အချောင်ရတဲ့ကုသိုလ်မို့လို့ ‘အချောင်ကုသိုလ်’ လို့လဲ ခေါ်လို့ရတာပေါ့အမေ၊ ဒီလိုအသိမြင်တွေဟာ သင်တန်းမှ ဘုန်းဘုန်းများက ပြောဟောဆုံးမလို့ သိလာရတာတွေပါအမေ” လို့ သားဖြစ်သူကိုရင်ရဲ့ စကားကိုကြားလိုက်ရတော့ အမေဖြစ်သူရဲ့ မျက်လုံးအိမ်မှာ မျက်ရည်ကြည်လေးတွေဝေ့နေပါတော့တယ်။ အော်……..ကြည်နူးမှုပီတိတွေအပြည့်နဲ့ပေါ့….။
နေ့လည်ဖက် နားနေတဲ့အချိန်မှာ “အရှင်ဘုရား….ရန်ကုန်က ဒကာတွေ ရောက်လာပါတယ်ဘုရား၊ အရှင်ဘုရားကို တွေ့ချင်လို့တဲ့ ဘုရား” လို့ ဒကာတစ်ဦးက လာရောက်လျှောက်ထားပါတယ်။
ကျောင်းပေါ်ရောက်လာတဲ့သူများအနက် အသားညိုညိုနဲ့ လူတစ်ယောက်က “အရှင်ဘုရား ….တပည့်တော် ပန်းဒကာကိုတင်မြင့်ပါ ဘုရား” လို့ ပြောလိုက်တော့ စာရေးသူမှာ မမျှော်လင့်ဘဲ တွေ့လိုက်ရတဲ့အတွက် ၀မ်းသာမဆုံးရှိခဲ့ပါတယ်။ နောက်သာသနာရေးနဲ့ပတ်သက်တဲ့ အကြောင်းတွေကို ပြောဆိုကြပြီး၊ ညဖက်ကလေးတရားပွဲမှာ ကလေးတရားဟောပေးဖို့ ပြောတဲ့အခါ ပန်းဒကာက ကြည်ဖြူစွာပဲ လက်ခံခဲ့ပါတယ်။
သို့နှင့် စာရေးသူတို့ ဗုဒ္ဓယဉ်ကျေးမှုသင်တန်းမှာ ပန်းဒကာကြီးက ကလေးတရားပွဲ နှစ်ညတိုင်တိုင် ချီးမြှင့်ပေးခဲ့ပါတယ်။
ထူးဆန်းပုစ္ဆာ မေးတဲ့အခါ
“ အရှင်ဘုရား……….စိတ်ထဲရှိတာလေးတစ်ခုကို မေးချင်ပါတယ်ဘုရား၊ တကယ်လို့ တပည့်တော်မေးတဲ့အမေးက မှားနေရင်လဲ တောင်းပန်ပါတယ်ဘုရား၊ အရှင်ဘုရား….စောစောထမှ တရားရမှာလား ဆိုတာသိချင်ပါတယ်ဘုရား” တတိယဆင့်သင်တန်းသားကိုရင်တစ်ပါး က သင်တန်းဆရာအား မေးလိုက်တာပါ။
တရားဆိုတာ ပါဠိလိုက ဓမ္မ လို့ခေါ်တယ်။ အမှန်သဘာဝတရားကို သိနိုင်ဖို့အတွက် သားတို့နားလည်အောင်ပြောရရင် အခြေခံကုသိုလ်တွေ အများကြီးလိုအပ်ပါတယ်။ ကုသိုလ်တွေက ဘယ်လောက်အထိလိုအပ်သလဲဆိုရင် “ကုသလဿုပသမ္ပဒါ” ကုသိုလ်တရားကို ပြည့်စုံအောင် အားထုတ်ကြလို့မိန့်တော်မူထားတဲ့အတွက် ကုသိုလ်တရားမှန်သမျှု ရသလောက်ယူကြရမှာပါ ဘယ်အချိန်အထိဆိုရင် မဂ်ဖိုလ်နိဗ္ဗာန်ရောက်တဲ့အထိ ဖြစ်ပါတယ်။ ဒါကြောင့် ဒီဘ၀ဒီခန္ဓာမှာ ကုသိုလ်တရားတွေကို ကုသိုလ်ပုံကြီး မိုးလောက်နီး ဆိုတာလို ကုသိုလ်တွေ များသထက်များအောင် ယူထားဖို့လိုပါတယ်။
ဒီလိုကုသိုလ်တွေယူဖို့အတွက် သားတို့သမီးတို့ အအိပ်နည်းကြရမှာပါ။ အိပ်ပျော်နေတဲ့သူတစ်ယောက်ဟာ ကုသိုလ်တွေ ရဖို့နည်းပါး လှပါတယ်။ အိပ်တဲ့အခါ လိုအပ်တာထက်ပိုပြီး အိပ်ရင် ထိုင်းမှိုင်းတယ်၊ အချိန်လဲကုန်လှပါတယ်။ ဒီတော့ ညဦးဘက်ကို စောစောအိပ်ရာဝင်ပြီး နံနက်ကို စောစောထကြရင် ပိုကောင်းတယ်။ မနက်စောစောထပြီး ဘုရားအာရုံနဲ့ တရားအာရုံနဲ့နေရင် စိတ်တွေချမ်းသာတယ်။ ကုသိုလ်တွေလဲ အများကြီးရပါတယ်။ တကယ်လို့ စောစောမထရင် စောစောကုသိုလ်မရဘူးဆိုတာ နားလည်ကြရပါမယ်။
တရားရဖို့အတွက် ကုသိုလ်များများယူနိုင်ဖို့ စောစောထရမှာဖြစ်တယ်။ စောစောထရတဲ့အတွက် တစ်နေကုန်စိတ်တွေ မကြည်ဘူးလို့ မှတ်ထင်တဲ့သူတွေလဲရှိတယ်။ အမှန်က စိတ်မကြည်တာဟာ စိတ်ကိုညစ်နွမ်းစေတတ်တဲ့ နိဝရဏတရားတွေကြောင့်ဖြစ်ပါတယ်။ စောစောထလို့ မဟုတ်ပါဘူးဆိုတာ နားလည်စေချင်ပါတယ်။
ဒါ့ပြင် လူတစ်ယောက် အိပ်နေတဲ့အချိန်ဟာ သေဖို့ရာ အလွန်လွယ်ကူပါတယ်။ တစ်ခါတုန်းက ဒကာမကြီးတစ်ဦးဟာ မိသားစုနဲ့အတူ ညဦးကာလအချိန်မှာ တီဗွီကြည့်ပြီး ပျော်ပျော်ပါးပါးစကားပြောဆိုနေကြပါတယ်။ ညဥ့်နက်လို့ အိပ်ယာဝင်တဲ့အခါ ည ၁၁ နာရီလောက်မှာ အိပ်မောကျနေတုန်း ဒကာမကြီးရဲ့အသက်ရှူလမ်းကြောင်းမှာ အရာတစ်ခုဝင်ပိတ်ရာကနေ အသက်သေဆုံးသွားပါတယ်။ ဆရာဝန်တောင် မမီလိုက်ပါ။ ဒါဟာ အိပ်နေတဲ့အချိန်မှာ လူတစ်ယောက်အတွက် သေဖို့အလွန်လွယ်ကူတဲ့အချိန်ပါ။ ဒါကြောင့် စောစောအိပ်လို့ စောစောထလို့ စောစောကုသိုလ်ယူကြပါစို့ လို့ ပြောရင်း သင်တန်းဆရာကိုယ်စား အဖြေပေးလိုက်ပါတယ်။
မေတ္တာတရားစွမ်းပကား
သင်တန်းစလို့ နှစ်ရက်မြောက်ရောက်တယ်ဆိုရင်ပဲ ကိုရင်တစ်ပါး အပျင်းဖျားပြီး သွေးလွန်တုတ်ကွေးရဲ့ လက္ခဏာကို တွေ့မြင်ရပါ တယ်။ သို့နဲ့ ကလေးအထူးကုဆရာဝန်ဒေါက်တာချိုချိုဝင်းက ကလေးအား အရေးကြီးတဲ့အတွက် သူမရဲ့ကားနဲ့ပဲ ကလေးဆေးရုံသို့ ပို့ဆောင် ပေးလိုက်ပါတယ်။ ဒါနဲ့ နောက်တစ်ရက်ကြာတဲ့အခါ ကလေးဟာ နှာခေါင်းကသွေးတွေလျှံတယ်။ ပါးစပ်ကလဲ သွေးတွေအံတယ်၊ အောက်ကလဲ သွေးဝမ်းတွေသွားနေတယ်။ နောက် (၃၆)နာရီအတွင်း သေနိုင်တယ်လို့ ကြားရပါတယ်။ ကလေးရဲ့ကျန်းမာရေးအခြေအနေသိပ်မကောင်းပါ။ ခန္ဓာကိုယ်ထဲရှိသွေးကြောတွေ အတော်များများပြတ်ပြီး သွေယိုစိမ့်မှုဖြစ်နေပါတယ်။ ရှင်းရှင်းပြောရရင် စိုးရိမ်ရတဲ့အခြေအနေဖြစ်နေတယ်လို့ ပြောပါတယ်။
သို့နဲ့စာရေးသူလဲ ကလေးအတွက်စဉ်းစားရင်း အိပ်မပျော်ခဲ့ပါ။ မနက်ပိုင်း ၄း၃၀ နာရီမှာ သီလခံယူဖို့နဲ့ သြ၀ါဒခံယူဖို့စောင့်နေကြတဲ့ ကလေးတွေဆီသို့ သွားကာ သီလပေးပြီးသြ၀ါဒစကားပြောခဲ့ပါတယ်။
သားတို့သမီးတို့……လူတိုင်းလူတိုင်း တစ်နေ့ သေရမဲ့သူချည်းဖြစ်တယ်။ ငယ်ငယ်ရွယ်ရွယ်နဲ့လဲ သေနိုင်တယ်။ သေခြင်းတရားဟာ ကိုယ့်ဆီကို အချိန်မရွေးရောက်ရှိလာနိုင်ပါတယ်။ အခုလဲ သားတို့ရဲ့သင်းတန်းအဖေါ်တစ်ပါးဖြစ်တဲ့ မောင် …………….ဟာ ရောဂါတစ်ခုနဲ့ ဆေးရုံတက်နေရတယ်ဆိုတာလဲ သားတို့သမီးတို့အသိပါ။ သူဟာ အခုဆိုရင် စိုးရိမ်ရတဲ့အခြေအနေမှာ ရှိနေတယ်။ အချိန်မရွေးသေနိုင်တယ်လို့ ဆရာဝန်များက ပြောပါတယ်။
သားတို့သမီးတို့ မေတ္တာရဲ့စွမ်းအားဟာ အားလုံးကို အောင်နိုင်တယ်လို့ ဘုရားရှင်မိန့်တော်မူထားတယ်လေ။ ဒီမှာရှိကြတဲ့ ၂၀၀လောက်ရှိတဲ့သားတို့သမီးတို့ရဲ့ မေတ္တာစွမ်းအားနဲ့ မောင်………………ကို ဘေးရန်ကင်းအောင် မေတ္တာတွေပို့ကြမယ်နော်။ သားတို့သမီးတို့ တင်ပလ္လင်ခွေထိုင်ကြမယ်။ ဘယ်ဖ၀ါးပေါ်ညာလက်ဖ၀ါးဖြန့်တင်ထား၊ ခါးကိုဖြောင့်စွာထား၊ ခေါင်းကို အသာလေးတည့်ထား၊ မျက်စိကို အသာလေးမိတ်ထားလိုက်ကြပါ။ ပီးတဲ့အခါ သားတို့သမီးတို့နဲ့ရင်းနှီးတဲ့ မောင်……………..ကို မျက်စိထဲ(အာရုံထဲ)မြင်အောင်ကြည့်နော်။
မောင်……………………သည် ကျန်းမာပါစေ ချမ်းသာပါစေ ဘေးရန်ကင်းပါစေ လို့ စိတ်နဲ့ရွတ်ပြီး အထပ်ထပ်ပွားလိုက်ကြပါသားတို့ သမီးတို့……………။
ထိုအချိန်က စာရေးသူအပါအ၀င် သင်တန်းသား/သူအားလုံး ဆယ်မိနစ်ခန့် မေတ္တာပို့ခဲ့ကြတာပါ။ တွေးမိတာက သင်တန်းသား ၂၀၀-တို့ရဲ့ မေတ္တာဟာ မနည်းပါဘူး။ အားလုံးမပို့နိုင်ဦးတော့ သင်တန်းသား နှစ်ရာလောက်ရဲ့ မေတ္တာလှိုင်းတွေဟာ ကလေးဆီ ရောက်ဖို့သေချာနေတယ်ဆိုတာကို တွေးရင်း မောင်………………..ကျန်းမာပါစေ ချမ်းသာပါစေ ဘေးရန်ကင်းပါစေ……….ရယ်လို့ စာရေးသူလဲ မေတ္တာအထပ်ထပ်ပို့ပေးနေလိုက်ပါတယ်။
ဒီလိုနဲ့ ညနေပိုင်းမှာ ကလေးဆေးရုံကို သွားကြည့်ပါတယ်။ ရောက်တော့ ကလေးရဲ့အမေက “အရှင်ဘုရား……သွေးလျှံတဲ့အတွက် သွေးရည်ကြည် သုံးပုလင်းသွင်း လိုက်ရပါတယ်ဘုရား၊ ဒါပေမဲ့ သွေးလျှံတာက ရပ်မသွားတဲ့အတွက် သွေးကိုလိုအပ်ရင် သွင်းဖို့အတွက် သွေးထပ်ရှာခိုင်းထားပါတယ်ဘုရား၊ ဒီလိုနဲ့ မကြာလိုက်ပါဘူး။ သွေးဟာ ရုတ်တရက်အံ့သြလောက်အောင်ကို တိတ်သွားလို့ သွေးလဲမသွင်းရတော့ပဲ ကျန်းမာရေးအခြေအနေကောင်း မွန်လာပါတယ်ဘုရား” လို့ ပြောပါတယ်။ ကြားလိုက်ရတဲ့စကားကြောင့် စိတ်ချမ်းသာသွားရသူက စာရေးသူပါ။
အော်……..မေတ္တာတရားရဲ့အစွမ်းထက်ပုံဟာ အံ့မခမ်းပါပဲလား……………..လို့ တွေးမိပါတော့တယ်။
