အခုနှစ် ကဆုန်လရဲ့ နေပူဒါဏ်က ပြင်းထန်လွန်းပါတယ်၊ စကားပုံတစ်ခုရှိတယ်၊ “တော်သလင်းနေ ပုဇွန်သေ” တော်သလင်းလရဲ့အပူဒါဏ် ကြောင့် အင်းအိုင်ထဲက ပုဇွန်များ သေကြရတယ်။ ဒါက တော်သလင်းလ အပူဒါဏ်ရဲ့ ပြယုဂ်တစ်ခုပါ၊ အခုတော့ “ကဆုန်လရဲ့ နေပူဒါဏ်ကြောင့် တိရစ္ဆာန်သာမက လူပါအသက်ဆုံးရှုံးခဲ့ကြရတဲ့အတွက် “ကဆုန်လနေ လူပါသေ” လို့ ပြောရမဲ့အခြေအနေဖြစ်နေပါပြီ။
.
ကဆုန်လရဲ့အပူဒါဏ်ဟာ သတ္တ၀ါများကို သနားငှဲ့ညာ စာနာထောက်ထားမှု လုံးဝမရှိပဲ အပြင်းအထန်နှိပ်စက်နေတယ်။ နေပူခေါင်ခေါင်ထဲ သွားရာက ပူလို့ဆိုပြီး စနိုးတာဝါပိုင်းလေးနဲ့ ဦးခေါင်းကို သုတ်လိုက်ရုံနဲ့ အရုပ်ကြိုးပြတ်လဲကျ အသက်ပျောက်ခဲ့ရတယ်။ ဒါက အပူဒါဏ်ကြောင့် အအေးဓါတ်ကို ရှာယူရာကနေ အသက်ဆုံးရှုံးခဲ့ရတာပါ။ ဘ၀အတွက် ရုန်းကန်နေရတဲ့ဆိုက်ကားသမားကလဲ ၀မ်းစာရေးအတွက် နေပူဒါဏ်ကို အံတုပြီး ဆိုက်ကားနင်းးရင်းနဲ့ အပူဒါဏ်ကြောင့် ဦးနှောက်အကြောပြတ်ကာ ရုတ်တရက်လဲကျ ဆေးရုံရောက်တော့ အသက်ပျောက် သွားရရှာပါတယ်။ ဒါက ၀မ်းစားရေးရှာဖွေရာကနေ အပူဒါဏ်ကြောင့် အသက်ဆုံးရှုံးခဲ့ရတာပါ။ ဒါကြောင့်လဲ အခုနှစ်အပူဒါဏ်ဟာ တိရစ္ဆာန်သာမက လူတွေကိုပါ ၀ါးမျိုခံလိုက်ရပါပြီ။ တနည်းပြောရရင် အပူဒါဏ်ကြောင့် တစ်ချို့လူအများ စိုးရိမ်ရေအမှတ်ကို ရောက်ပြီး သေဆုံးခဲ့ရပါတယ်။
အညာဒေသ ပူပြင်းတဲ့ရာသီမှာ အညာသူအညာသားများက “ပူလိုက်တာ….ခုနေအခါ ဘူးခါထဲကရေလေးများ သောက်လိုက်ရရင် ဘယ်လောက် ကောင်းလိုက်မလဲ။ ကြမ်းကြားကလေအေးအေးလေးနဲ့ တွေ့လိုက်ရရင် ဘယ်လောက်ကောင်းလိုက်မလဲ” လို့ အပူဒါဏ်ကြောင့် အအေးကို တမ်းတကြပါတယ်။ ဒါကိုရည်ရွယ်ပြီး “ဘူးခါးရေသောက် ၊ ကြမ်းကြားလေအောက်” လို့ စကားပုံလေးရှိခဲ့ဖူးပါတယ်။
ဘူးခါးရေဆိုတာက ဘူးခါးသီးအစိမ်းကို ထိပ်ကအပေါက်ဖေါက်ပီး အထဲက အသားနဲ့အူတိုင်တို့ကို ယူထုတ်ပစ်ရပါတယ်။ ဘူးခါးသီး အခွံချည်းကျန်တဲ့အခါ နေပူလှမ်းထားရတယ်။ နွေရာသီရောက်ပီဆိုရင် အသားအူထုတ်ထားတဲ့ ဘူးခါးသီးထဲကို ရေထည့်ထားရပါတယ်။ ထည့်ထားတဲ့ရေဟာ ကြာလာတာနဲ့အမျှ အေးမြလို့ နေပါတော့တယ်။ အပူဒါဏ်ကြောင့် ရေဆာတဲ့အခါ ဘူးခါးထဲက အလွန်အေးမြတဲ့ရေကို အညာသူအညာသားများ သောက်လေ့ရှိကြတယ်။ အဲဒီကနေ ‘ဘူးခါးရေသောက်’ ဆိုတဲ့စကားဖြစ်လာတာပါ။ ဒါပေမဲ့ခုအချိန်မှာတော့ ပူပြင်းတဲ့ဒါဏ်ကြောင့် ဘူးခါးထဲကရေလဲ မအေးနိုင်တော့။
ကြမ်းကြားလေဆိုတာက အညာဒေသ အချို့အိမ်လေးတွေမှာ ကြမ်းခင်းကို ၀ါးခြမ်းပြားနဲ့ ခင်းထားကြတတ်ကြတယ်။ ဒီကြမ်းကြားက တိုက်ခိုက် လာတဲ့လေဟာ အေးတယ်လို့ဆိုပါတယ်။ စကားစပ်လို့ ပြောအုံးမယ်။ စာရေးသူ ရန်ကုန်ရောက်ခိုက် သီတင်းသုံးဖေါ်များနဲ့အတူ နေပြည်တော်ကို ရောက်ခဲ့ပါတယ်။ နေပြည်တော်ကနေ (၈)မိုင်လောက်ဝေးတဲ့ အောင်လံ တောရကို ဆိုင်ကယ်နဲ့ လာခဲ့ကြပါတယ်။ တောရကျောင်းရောက်တော့ စာရေးသူတို့ နေ့လည်ဖက် အေးအေးလူလူ နားနေရအောင်ဆိုပြီး သစ်ပင်ကြီးအောက်မှာ အောင်လံရွာသူ/ရွာသားများက လေးတိုင်စင် ကျောင်း(တဲ)လေးထိုးပေးပါတယ်။ နေစရာကျောင်းလေးတွေလဲ အဆင်သင့်ရှိပါတယ်။ ဒါပေမဲ့ နေ့လည်နေ့ခင်း အပူဒါဏ်ကြောင့် မနေနိုင်မှာစိုးလို့ဆိုပြီး တောရကျောင်းဆရာတော်က ရွာသားများခေါ်ကာ ချက်ခြင်း စီမံပေးတာပါ။ လေးတိုင်စင် တဲကျောင်း လေးမှာ အမိုးက သက်ငယ်မိုးဖြစ်ပြီး အခင်းကြတော့ အအေးဓါတ်ရအောင် ၀ါးခြမ်း အစိမ်းလေးတွေနဲ့ ကြမ်းခင်း ခင်းပေးကြပါတယ်။
အဲဒီမှာ ကြမ်းက ၀ါးခြမ်းအစိမ်းဆိုတော့ ခင်းခါစမှာ အေးနေတာပေါ့၊ ဒါပေမဲ့ နောက်တစ်နေ့ရောက်တော့ အပူဒါဏ် ကြောင့် ၀မ်းခြမ်းများဟာ အ၀ါရောင်ဖက်ကို ပြောင်းလာတာနဲ့အတူ ဒီအခင်းပေါ်ထိုင်လိုက်တဲ့အခါမှာလဲ ပူလို့နေပါတော့တယ်။ ကြမ်းပြားတွေပူနေမှတော့ ကြမ်းကြား အောက်ကလာတဲ့လေဟာလဲ ဘယ့်နှယ်လုပ် အေးနိုင်တော့မှာလဲ။ ဒါကြောင့် ဘူးခါးရေ ကြမ်းကြာလေဟာ အေးမြတဲ့အသွင်ကိုဆောင်ကြတယ်ဆိုပေမဲ့ အခုနှစ်မှာတော့ ဘူးခါးထဲကရေလဲ မအေးနိုင်တော့သလို၊ ကြမ်းကြားအောက်ကတိုက်လာတဲ့လေဟာလဲ မအေးနိုင်တော့ပါ။ ဒါဟာ ဖြစ်တောင့်ဖြစ်ခဲ ပြင်းလွန်းတဲ့အပူဒါဏ်ရဲ့ ပြယုဂ်တစ်ခုအဖြစ် မှတ်တမ်းတင်ရမှာပါ။
အခုနှစ်အပူဒါဏ်ကြောင့် တစ်ခါမှ မခမ်းဘူးတဲ့ အင်းလေးကန်အထဲကရေတွေလဲ ခမ်းလို့နေပါပြီ။ ကဲလွန်းတဲ့အပူဒါဏ်ကြောင့် လူအများလဲ ဒုက္ခအကြီးအကျယ်ရောက်ခဲ့ကြရတယ်။ ဒါက ပတ်ဝန်းကျင်ရဲ့ အပူဒါဏ်ကို ပြောတာပါ။
တစ်နေ့စာရေးသူ ရန်ကုန်မြို့ထဲသို့ ကိစ္စတစ်ခုနဲ့ အငှားကားစီးသွားခဲ့ပါတယ်။ ကားစီးရင်း….
စာရေးသူက ကားသမားအား “ဒကာကြီး…..အခုနှစ် ပူချက်ကတော့ ကန်းကုန်နေတာပဲနော်” လို့စကားစလိုက်တယ်ဆိုရင်ပဲ.. ကားသမားက
“မှန်ပါ့ဘုရား…..ဒီအပူကတော့ ပြောစရာမကျန်တော့လောက်အောင်ကို ပူတာပဲဘုရား၊ ဘယ်မှာမှ မနေနိုင်အောင် ဖြစ်ရပါတယ်။ ကားထဲမှာလဲ အရှင်ဘုရားမျက်မြင်ပါပဲ၊ အင်ဂျင်စက်အပူရှိန်နဲ့ ပိုတောင်ဆိုးသေးတယ်ဘုရား၊ ဘယ်တတ်နိုင်မလဲဘုရား၊ တပည့်တော်တို့မှာတော့ ၀မ်းစာရေးအတွက် ဘယ်လောက်ပူပူ ရှာရတာပါပဲဘုရား၊ ဒါပေမဲ့ ဘယ်လောက်ပဲပူပါစေ၊ တပည့်တော်တို့ရင်ထဲကလာတဲ့အပူတွေကို့ မမီနိုင်ဘူးလေ ဘုရား..” လို့ ကယားရေလွတ် ပြောလာပါတယ်။
ဒီအခါကျမှ ကားသမားရဲ့စကားကို သတိထားမိပါတော့တယ်။ မှန်လိုက်တာ…..သဘာဝပတ်ဝန်းကျင်အပူက ဘယ်လောက်ပူပြင်းပါစေ ရင်ထဲကလာတဲ့အပူကို မမီနိုင်ပါဘူး။ ရင်ထဲကကိုယ့်အပူလောက်ပဲလားဆိုတော့ မဟုတ်သေးဘူး။ သူတစ်ပါးအပူများဖြစ်တဲ့သားအပူ မယားအပူ၊ သမီးအပူ၊ ဆွေမျိုးအပူ၊ ပစ္စည်းဥစ္စာအပူစတဲ့ တစ်ပါးသူရဲ့အပူကိုဝင်ပြီး အငှားပူပေးတဲ့အပူတွေလဲ ပူလောင်လွန်းလှပါတယ်။ အမျိုးစုံတဲ့ရင်ထဲကအပူများ ကို ဘယ်အပူမှ မမီနိုင်ပါဘူး။
အခုလဲ ကားသမားဟာ ပကတိအပူဒါဏ်ကို အံတုရင်း ရင်ထဲကလာတဲ့ အပူဒါဏ်အတွက် ၀မ်းစာရှာဖွေနေရတာပါ။ လူတစ်ယောက်ဟာ ကိုယ်ခန္ဓာရဲ့အပူချိန် ပုံမှန်ထက်အများကြီး ကဲပိုသာလွန်နေရင် အသက်အတွက် စိုးရိမ်ရေအမှတ်ကို ရောက်နေပါတယ်။ ဒီလိုပါပဲ…
ရင်ထဲက အပူများလွန်းလာတယ်ဆိုရင် အသက်အတွက် စိုးရိမ်ရေအမှတ်ကို ရောက်လုနီးနီးဖြစ်လာတော့တာပဲ၊ အချို့ဆိုရင် ပစ္စည်းဥစ္စာများ ဆုံးပါးတဲ့ အပူကြောင့် စိုးရိမ်ရေအမှတ်က မကျော်နိုင်ပဲ အသက်ပျောက်ခဲ့ရတာလဲရှိပါတယ်။
တစ်ခါက တောင်ပြုံးပွဲဆင်နွဲနေတဲ့ အမျိုးသမီးကြီးတစ်ယောက် သူမပိုင်တဲ့အိမ်ရော အတွင်းပစ္စည်းများပါ မီးထဲပါသွားတယ်။ ဒီသတင်းကြားလိုက်ရတဲ့ခဏ ထိုအမျိုးသမီးကြီးဟာ သွေးတိုးတက်ကာ နေရာတင် အသက်ပျောက်ခဲ့ရပါတယ်။ ဒါဟာ ပစ္စည်းဥစ္စာအပူကြောင့် စိုးရိမ်ရေ အမှတ်ကို ရောက်သွားရတာပါ။ အော်… ရင်ထဲကလာတဲ့အပူများဟာ လောကလူသားများအား ဘယ်အထိအောင် နှိပ်စက်နေဦးမှာလဲ၊ သေချာတာကတော့ “သေတဲ့အထိ နှိပ်စက်နေဦးမှာပါ” ဟုတ်တယ်။ သေတဲ့အထိ အနှိပ်စက်ခံရအုံးမယ်…. သေတဲ့အထိ အနှိပ်စက်ခံရအုံးမယ်…. သေတဲ့အထိ အနှိပ်စက်ခံရအုံးမယ်….
လောကမှာ ပကတိအပူဒါဏ်ထက် ရင်ထဲကလာတဲ့အပူဒါဏ်က သာလွန်ပါတယ်။ ရင်ထဲကလာတဲ့ အပူဒါဏ်ထက် လောဘ၊ ဒေါသ၊မောဟ အပူများကသာလွန်ပါတယ်။ဟုတ်တယ်၊ လောကမှာ ကိလေသာအပူလောက် ပူတဲ့အပူမရှိပါ။ ကိလေသာအပူဆိုမှတော့ မီး တစ်ဆယ့်တစ်မီးစလုံး ပါဝင်သွားပါပြီ။
ပကတိအပူကြောင့် စိုးရိမ်ရေအမှတ်မကျော်ဖြတ်နိုင်ကြသလို ရင်ထဲကလာတဲ့အပူကြောင့်လဲ စိုးရိမ်ရေအမှတ်ရောက်ခဲ့ကြရပါတယ်။ ဒါ့အပြင် ကိလေသာအပူမီးကြောင့်လဲ စိုးရိမ်ရေအမှတ်ရောက်ခဲ့ရပါတယ်။ အိုတဲ့အပူမီး၊ နာတဲ့အပူမီး၊ သေတဲ့အပူမီး၊ သောကအပူမီး၊ ပရိဒေ၀အပူမီး၊ ကိုယ်ဆင်းရဲတဲ့အပူမီး၊ စိတ် ဆင်းရဲတဲ့အပူမီး၊ အပြင်းအထန်ပူပန်တဲ့အပူမီးများကြောင့်လဲ စိုးရိမ်ရေအမှတ်ရောက်ခဲ့ကြရပါတယ်။လူသားများ အပူမီးကြားထဲမှာ စိုးရိမ်ရေအမှတ်ရောက်ခဲ့ကြရသလို စာရေးသူလဲ လူသားထဲက လူသားပေမို့ စိုးရိမ်ရေအမှတ်ရောက် လုနီးဖြစ်ခဲ့ရပါတယ်။ ဖြစ်ပုံက….
ဒီနှစ်ထဲမှာ စာရေးသူဟာ ချောင်းဆိုးလိုက် ပြန်ကောင်းလိုက်နဲ့ သံသရာလည်နေတာ ကြာခဲ့ပါပီ။ ဒီရောဂါအတွက် နေရပ်မြို့မှာပဲ ပထမအစစ်ဆေးခံပါတယ်။ နောက် ရန်ကုန်မြို့ရဲ့ ဆေးခန်းတစ်ခုမှာ အစစ်ဆေးခံပါတယ်။ စစ်ဆေးပေးတဲ့ ဆရာဝန်က အဆုတ်နဲ့ရင်ခေါင်းခွဲစိတ် အထူးကုဆရာဝန်ပါ။ ရောဂါကုတဲ့နေရာမှာ တိကျတယ်၊ ပြတ်သားတယ်၊ ကျွမ်းကျင်တယ်လို့ သတင်းကောင်းထွက်နေတဲ့ ဆရာဝန်ပါ၊ တကယ်လဲမှန်ပါ တယ်။
ပထမဓါတ်မှန်ရိုက်ခိုင်းပါတယ်။ ဓါတ်မှန်ကို ကြည့်ပြီး ဆရာဝန်က ပိုပြီးတိကျသေချာအောင် CT ဓါတ်မှန်(အရပ်အခေါ် ကွန်ပျူတာဓါတ်မှန်) အရိုက်ခိုင်းပါတယ်။ နောက်တစ်ရက် ဆေးခန်းပြတဲ့အခါ ဆရာဝန်က “ အရှင်ဘုရား….အရှင်ဘုရားရဲ့အဆုတ်ကို ခွဲထုတ်ပီး လှီးပစ်ရမယ်ထင်တယ် ဘုရား။ ဒီအတွက်ဘာမှ ပူစရာမလိုပါဘူး၊ ခဏလေးပဲ ခွဲပီး ထုတ်ပစ်လိုက်ယုံပါပဲဘုရား၊ လောလောဆယ် တပည့်တော် ဆေး ၂ ပါတ်စာ ပေးလိုက်ပါ့မယ်။ ဆေးသောက်ပီးတဲ့အခါ CT ဓါတ်မှန်ပြန်ရိုက်ရမယ်၊ အဆင်မပြေရင်တော့ ခွဲ့ရလိမ်မယ်ဘုရား၊ အရှင်ဘုရားဟာက ကင်ဆာ မဟုတ်ရင် ဗိုင်းရပ်စ်တစ်မျိုးမျိုးဖြစ်နိုင်တယ်”
ကင်ဆာစကားကြားရတော့ ခံစားရတယ်။ စာရေးသူသာမဟုတ် လူသားအားလုံးလဲ ဒီလိုပါပဲ။ ယနေ့ခေတ် လူသားများကို ချိန်းချောက်နေတဲ့ တစ်ခုတည်းသောရောဂါဟာ “ကင်ဆာရောဂါ” ပါ်။ ကင်ဆာဆိုရင် မကြောက်တဲ့သူမရှိ၊ လူတိုင်းကြောက်ကြတယ်။ ဒါနဲ့စာရေးသူက “ဒကာကြီး….စိုးရိမ်ရလား” လို့မေးလိုက်တော့ “ အရှင်ဘုရား..စိုးရိမ်စရာမရှိပါဘူး” လို့ပြန်ဖြေပါတယ်။ ဘယ်လောက်ပဲ စိုးရိမ်စရာမရှိ လို့ပြောပါစေ မသေချာသေးတဲ့ကင်ဆာရောဂါအတွက် စိတ်ထဲပူပန်မိတာတော့ အမှန်ပါ။
တစ်ချို့ဆိုရင်ကင်ဆာလို့ပြောလိုက်တာနဲ့ စားမ၀င်အိပ်မပျော်ဖြစ်ကာ ပိုပြီးအသေမြန်သွားတာမျိုးလဲ ရှိတတ်ပါတယ်။ ဒါဟာ အနာရောဂါ ကြောင့် စိုးရိမ်ရေအမှတ်ကို ရောက်သွားရတာပါ။ ရောဂါကြောင့် ပူရတဲ့အပူလို့လဲ ပြောနိုင်ပါတယ်။
အခုလဲ စာရေးသူအတွက် မသေချာသေးတဲ့ရောဂါအတွက် အဖြေရရှိဖို့ နှစ်ပတ်ကြီးများတောင်စောင့်ရပေအုံးမယ်။ မှန်မှန်ပြောရရင် ဒီအချိန်တုန်းက တိတိကျကျအဖြေသိဖို့အတွက် ၁၄ ရက်ကို စောင့်ရတာဟာ ၁၄နှစ်လောက်ထင်ခဲ့တာပါ။ တကယ်တမ်း ရောဂါအဆုံးအဖြတ်ပေးမဲ့ ရက်ကိုရောက်ခါနီးပြန်တော့လဲ ဒီရက်ကို မရင်ဆိုင်ချင် ဖြစ်ရပါတယ်။ ဒါပေမဲ့ မရင်ဆိုင်ချင်လဲ ရင်ဆိုင်ရမှာတော့မှာပါ။ ဒီလိုပါပဲ လောကလူသားများဟာ သေခြင်းတရားကို မရင်ဆိုင်ချင်လဲ ရင်ဆိုင်ကြရမှာပါ။
ရောဂါအတွက်မသေချာမရေရာတဲ့အခြေအနေမှာ ဖုန်းမြည်သံကြောင့် ဖုန်းကိုင်လိုက်တော့ “အရှင်ဘုရား…နေကအလွန်ပူပြင်းပါတယ်၊ တပည့်တော်တို့ရွာကို ဒီနှစ်မကြွခဲ့နဲ့တော့ဘုရား။နောင်နှစ်မှပဲ ကြွခဲ့ပေါ့ဘုရား”လို့ အညာဒေသရွာတစ်ရွာက ဒကာတစ်ဦးဖုန်းဖြင့် ပြောလာပါတယ်။ ဒီအတွက် ဘယ်လိုအဖြေပေးရမှန်းမသိ ဖြစ်နေရသူက စာရေးသူပါ။ ဘာ့ကြောင့်ဆိုရင် စာရေးသူမှာက ကင်ဆာလား ဗိုင်းရပ်စ်လားဆိုတာမသိ တကယ်လို့ ကင်ဆာရောဂါဖြစ်နေမယ်ဆိုရင် ကိုယ့်အတွက် နောက်နှစ်ဆိုတာမရှိတော့၊ ဆက်လက်အသက်ရှင်သန်ခွင့် မရနိုင်တော့၊ ဒါနဲ့ပတ်သက်ပြီး ငါဘယ်လို အဖြေပေးရမလဲ၊၊ အနာဂါတ်မှာ မသေခြာမရေရာတဲ့စာရေးသူအတွက် “နောင်နှစ်မှာ လာပါ့မယ်”ဆိုတဲ့စကားကို ဘယ်လိုပြန်ဖြေရမှန်းမသိ ဖြစ်ခဲ့ရပါတယ်။ ဒီအဖြစ်မျိုး စာချစ်သူများလဲ ကြုံဖူးကြမှာပါ၊ သတိမထားမိလို့သာ ဖြစ်ချင်ဖြစ်မယ်။
ဒီလိုနဲ့ ဒုတိယအကြိမ် ဆေးခန်း ပြန်ပြခဲ့ပါတယ်။ ရောဂါက ကင်ဆာမဟုတ် ဗိုင်းရပ်စ်တစ်မျိုးကြောင့်ဖြစ်တယ် လို့ သိလိုက်ရပါတယ်။
အော်…….ငါဟာစိုးရိမ်ရေအမှတ်က ကျော်ခဲ့ပြန်ပီကော လို့ ဟင်းချနိုင်ပါတော့တယ်။ ဒါပေမဲ့ ဒီတစ်ကြိမ်မှာ စိုးရိမ်ရေအမှတ်က ကျော်ဖြတ်နိုင်ခဲ့ ပေမဲ့ နောင်တစ်ကြိမ်ကြိမ်မှာတော့ စိုးရိမ်ရေအမှတ်ကို ရောက်တော့မယ်၊ ရှောင်ကွင်းလို့မရဘူးဆိုတာ သိနေပါတယ်။
ဒီလိုပါပဲ စာဖတ်သူများလဲ စိုးရိမ်ရေအမှတ်ကို ရောက်ကြရတော့မှာပါ။ အားလုံးစောင့်နေကြရတာပါ။ တကယ်တမ်း ဘ၀ကိုအဆုံးအဖြတ်ပေးမဲ့ အနာရောဂါဖြစ်လာတဲ့အခါ အင်အားနည်းတဲ့သူ မဖြစ်စေချင်ပါဘူး။ ရဲရဲဝံ့ဝံ့ရင်ဆိုင်နိုင်အောင် အင်အားရှိတဲ့သူဖြစ်နေဖို့ လိုပါတယ်။ ဒီအတွက် ကုသုလ်များများရအောင် သတိတရားထားပြီး နေဖို့ပါပဲ။ ဒါဟာ စိုးရိမ်ရေအမှတ်ကျော်ဖြတ်ဖို့အတွက် ကြိုတင်ပြင်ဆင်မှုတွေပါ။ ကုသိုလ်ရအောင် နေတတ်ပီဆိုရင် စိတ်ဓါတ်အင်အားလဲတိုးတက်လာမှာပါ။ လူတိုင်းဟာ ကုသိုလ်ဆိုတဲ့စိတ်ဓါတ်အင်အားနဲ့ စိုးရိမ်ရေအမှတ်ကို ကျော်ဖြတ်ကြရမှာပါ။
နောက်ဆုံး ပြောချင်တာက….စာချစ်သူများ ကြိုတင်ပြင်ဆင်မှုတွေနဲ့အတူ စိုးရိမ်ရေအမှတ်ကို ကျော်ဖြတ်နိုင်ကြပါစေလို့ ဆန္ဒပြုရင်း……
စိုးရိမ်ရေအမှတ်ကျော်ဖြတ်နိုင်ကြပါစေ
ဦးကောဝိဒ(မြိတ်)
