အမေး။ ။ဆိုက်ကိုလော်ဂျစ် စိတ်ပညာရှင်တွေ အဆိုအရ လူတစ်ယောက်မှာ သိစိတ်ဟာ (conscious) မသိစိတ်(subconscious mind)ထက် စွမ်းအားနည်းလှပါတယ်။ လူတစ်ယောက်မှာ သိစိတ်က (၁၀%)ရာခိုင်နှုန်းခန့်သာ ရှိပြီး၊ မသိစိတ်က (၉၀%)ရာခိုင်နှုန်းခန့် ရှိတယ် လို့ ယူဆကြပါတယ် ဘုရား။
လူတစ်ယောက်ဟာ မသိစိတ်ရဲ့စွမ်းအားတွေကို သိစိတ်နှင့် ယဉ်ပါးလာအောင် ပြုလုပ်နိုင်လျှင်(Unify) လုပ်နိုင်လျှင် အဘက်ဘက် အရာရာ ထူးချွန်လာနိုင်တယ်လို့ ကြားဖူးပါတယ်ဘုရား။
တပည့်တော်သိချင်တာက ဗုဒ္ဓ အဘိဓမ္မာမှာ မသိစိတ် ဟာ ဘယ်လိုစိတ်မျိုးလဲ ဆိုတာကို အနီးစပ်ဆုံး တွေးတောလို့ ရနိုင်ပါသလဲ ဘုရား။
ကိုကိုအောင်
ဆန်ဖရန်စစ္စကို
အဖြေ။ ။မသိစိတ်နဲ့ ပတ်သက်ပြီး (ဆိုက်ကိုလော်ဂျစ်) စိတ်ပညာရှင်အချို့က “ဘ၀င်စိတ်” လို့ ယူဆကြတယ်ဆိုတာ သိရပါတယ်။ ဒါပေမယ့် ဗုဒ္ဓရဲ့ အဘိဓမ္မာအရ အနီးစပ်ဆုံး တွေးကြည့်ပါက “ မောဟ” စိတ်ဖြစ်ဖို့များပါတယ်။ ဘာ့ကြောင့်လည်းဆိုရင် မောဟ စိတ်ဟာ ပုထုဇဉ်လူသားတစ်ယောက်ရဲ့ဘ၀ကို အတော်မျာများ နေရာယူထားလို့ပါပဲ။ မောဟ တရားရဲ့ ဆိုလိုရင်းမှာ အမှန်တိုင်းမသိခြင်း ဖြစ်တယ်။
မောဟတရား နှစ်မျိုးရှိတယ်။ အနုသယမောဟ နှင့် ပရိယုဋ္ဌာနမောဟ တို့ဖြစ်ကြတယ်။ ‘အနုသယ’ ပါဠိက ငြိမ်ဝပ်ခြင်း၊ ကိန်းအောင်းနေခြင်း ဆိုတဲ့ အဓိပ္ပါယ်ရပါတယ်။ ‘ပရိယုဋ္ဌာန’ ပါဠိက ထကြွခြင်း ဆိုတဲ့ အဓိပ္ပါယ်ရပါတယ်။
သတ္တ၀ါတို့ရဲ့သန္တာန်မှာ သိထိုက်တဲ့တရားမှန်သမျှကို မသိအောင် ဖုန်းကွယ်ထားတတ်တဲ့ ဓါတ်သတ္တိတစ်မျိုး ကိန်းအောင်းနေတယ်။ အဲဒီဓါတ်သတ္တိကို ‘အနုသယမောဟ’ လို့ခေါ်တယ်။ သောတာပန်၊သကဒါဂါမ်၊ အနာဂါမ် အရိယာများတောင်မှ အနုသယမောဟကို အဆင့်ဆင့်ပါးလှပ်ရုံသာ ဖြစ်ပြီး အဆင့်လိုက် ကိန်းအောင်းမြဲ ကိန်းအောင်နေခြင်း ဖြစ်တယ်။ ရဟန္တာဖြစ်မှ ပြတ်စဲပါတယ်။
တစ်ဖန် စိတ်နှင့်တွဲဖက်ပြီး မောဟ ဖြစ်လာပြီဆိုရင် အကုသိုလ်စိတ်သာ ဖြစ်ဖို့များပါတယ်။ ထိုအကုသိုလ်စိတ် ဖြစ်ပြီဆိုရင် အမှားအမှန်ကိုလည်း မသိတော့၊ သင့်/မသင့်ဆိုတာကိုလည်း မသိတော့၊ ထိုပရိယုဋ္ဌာနမောဟ ဖုန်းကွယ်မှုကြောင့် ပညာရှိများတောင်မှ ဒုစရိုက်အမှုများ ပြုမိတဲ့ အဖြစ်သို့ ရောက်ရတော့တယ်။ သာဓကတစ်ခု ထုတ်ပြပါ့မယ်။
တစ်ခါတုန်းက ဟရိတ ဆိုတဲ့ ဘုရားအလောင်းရသေ့ဟာ ဟိမ၀န္တာတောမှာ နေထိုင်ပြီး ဈာန်အဘိညာဏ်တွေရရှိပါတယ်။ တစ်နှစ်မှာ ဟိမ၀န္တာမှာ မိုးများတဲ့အတွက် ဗာရာဏသီမြို့သို့ လာခဲ့ပါတယ်။ ဗာရဏာသီပြည့်ရှင်မင်းက ရသေ့အား မြင် မြင်ခြင်း အလွန် ကြည်ညိုတဲ့အတွက် မင်းရဲ့ ဥယျာဉ်တော်မှာ နေထိုင်ဖို့ရာ ပြောပါတယ်။ တစ်နေ့ ဗာရဏာသီမင်းက သူပုန်များအား နှိမ်နှင်းဖို့ တိုင်းစွန် ပြည်ဖျားသို့ ထွက်ခါနီး မိဖုရားအား သူ့ဆရာရသေ့အား ကြွလာရင် ဆွမ်းလောင်းဖို့ မှာကြားပြီး စစ်မြေပြင်ထွက်ခဲ့တယ်။
မိဖုရားကြီးလည်း ဖြီးလိမ်းပြင်ဆင်ကာ ဆရာရသေ့ အလာကို စောင့်မျှော်နေပါတယ်။ ရသေ့ကလည်း အချိန်တန်တော့ ဈာန်အဘိညာဏ်ဖြင့် ကောင်ကင်ခရီးကနေ ကြွလာပြီး မိဖုရားရဲ့တိုက်ခမ်းလေသာ ပြူတင်းကနေ ၀င်ခဲ့ပါတယ်။ အဲဒီမှာ ရသေ့ရဲ့ လျှော်တေ သင်္ကန်း နဲ့ ပွတ်တိုက်တဲ့အသံကို ကြားလိုက်ပါတယ်။ မိဖုရားဟာ လန့်ဖြန့်ပြီး ထိုင်နေရာကနေ မတ်ရပ်လိုက်တဲ့အချိန်မှာ သူ့ရဲ့ခါးအ၀တ် အောက်ကို လျှောကျသွားတယ်။ အဲဒီအခြေအနေကို တွေ့မြင်လိုက်ရသောအခါ ကိန်းဝပ်နေတဲ့ အနုသယမောဟများဟာ စိတ်နှင့်တွဲဖက်ကာ ပရိယုဋ္ဌာနမောဟအသွင် ရောက်ရှိသွားပါတယ်၊ ရသေ့လည်း မောဟရဲ့ ဖုန်းကွယ်မှု ကြောင့် ဘာကိုမှ မမြင်တော့ဘဲ တဏှာလောဘဖြစ်ကာ မိဖုရားနဲ့ ကျုးလွန်ခဲ့ရတဲ့အဖြစ်ကို ရောက်ခဲ့တော့တယ်။ ဒါဟာ လူတစ်ယောက်မှာ အားကြီးတဲ့ မောဟ တရားကြောင့်ဆိုတာ သိသာလှပါတယ်။ဒါကြောင့် လူတစ်ယောက်မှာ ရာနှုန်းအတော်များများ နေရာယူနေတဲ့ မသိစိတ်ဆိုတာ ‘မောဟ’ ဖြစ်နိုင်ကြောင်း ဖြေကြားပေးလိုက်ပါတယ်။
