ရှောင်လွှဲ၍ မရသော အမှန်တရားများ (သို့) လက္ခဏာ (၃)ပါး။
ဒီနေ့တော့ ကိုထွန်းအောင် ရဲ့ မေးခွန်း သုံးခုအနက် နံပါတ်(၂)မေးခွန်းဖြစ်တဲ့ “အနိစ္စ၊ ဒုက္ခ၊ အနတ္တ တရားတို့ရဲ့ အဓိပ္ပါယ်ကို တပည့်တော်နားလည်အောင် ရှင်းပြပါ”ဆိုတဲ့ မေးခွန်းကို ဆွေးနွေးပေးပါ့မယ်။ ဒီသုံးပါးကို ခေါင်းစဉ် အနေအားဖြင့် “လက္ခဏာယဉ်” သုံးပါးလို့ခေါ်ပါတယ်။ လက္ခဏာဆိုတာကတော့ “သဘာဝတရား၊ အမှန်တရား၊ မဖောက်မပြန် မှန်ကန်သောသဘာဝ” လို့အဓိပ္ပါယ်ရပါတယ်။ ဗုဒ္ဓဘာသာ အများစုဟာ အနိစ္စ၊ မမြဲခြင်း၊ ဒုက္ခ၊ ဆင်းရဲခြင်း။ အနတ္တ၊ အစိုးမရခြင်း ဆိုတဲ့ အကြမ်းမျဉ်းအဓိပ္ပါယ်ကိုတော့ အားလုံးသိနေကြပါတယ်။ ဒါပေမယ့် ဘယ်လို မမြဲတာလဲ၊ ဆင်းရဲခြင်းက ဘယ်လိုလဲ၊ အစိုးမရဆိုတာ ဘာကိုပြောတာလဲ ဆိုရင်တော့ အဖြေရ တော်တော်ကြပ်ပါလိမ့် မယ်။
(၁) အနိစ္စ၊ မမြဲခြင်းနဲ့ ပါတ်သက်ပြီး ဗုဒ္ဓမြတ်စွာ ဓမ္မပဒပါဠိတော်မှာ ဟောကြားတော်မူတာက “သဗ္ဗေသင်္ခါရာ အနိစ္စာ” အလုံးစုံသော သင်္ခါရတရားတို့သည် မမြဲခြင်း သဘောရှိကုန်၏” ဟု ဟောတော်မူပါတယ်။ ဒီနေရာမှာ သင်္ခါရ ဆိုတဲ့စကားကို နည်းနည်းရှင်းပြဘို့လိုပါတယ်။ သင်္ခါရဆိုတာ ပြုပြင်ဖန်တီးခြင်းလို့ အဓိပ္ပါယ်ရပါတယ်။ ပြုပြင်ဖန်တီးတယ်ဆိုရာမှာ လူကပဲ ဖန်တီးသည်ဖြစ်စေ။ သဘာဝတရားက ပဲဖန်တီးသည်ဖြစ်စေ ဖန်တီးမှု မှန်သမျှကို သင်္ခါရလို့ပဲ ခေါ်ဆိုရပါတယ်။ အဲဒိတော့ လူက ဖန်တီးတဲ့ “အိမ်၊ကျောင်း ၊ ဇရပ်၊ အ၀တ်အထည်၊ ရေတွင်း၊ ရေကန်” စတဲ့ အရာတွေဟာလည်း င်္သါရသဘောထဲမှာ အကြုံးဝင်သလို။ သဘာဝတရားက ဖန်တီးတဲ့ “လူ၊ တိရစ္ဆာန်၊ သစ်ပင်၊ ပန်းမန်၊ ရေ၊ မြေ၊ တော၊ တောင်” စတဲ့ အရာတွေဟာလည်း သင်္ခါရသဘောတရားမှာပဲ အကြုံးဝင်ပါတယ်။ ဆိုလိုတာက လူကပဲ ဖန်တီးသည်ဖြစ်စေ သဘာဝတရားကပဲ ဖန်တီးသည်ဖြစ်စေ၊ အားလုံး ဟာ သင်္ခါရ၊ ဘယ်အရာမှ မမြဲဘူးဆိုတဲ့သဘောပါ။ ပထမဆုံးအနေဖြင့် သဘာဝတရားက ဖန်တီးထားတဲ့ (ဖန်တီးတယ် ဆိုတာ ပညတ် အနေအားဖြင့်သာ သုံးစွဲခြင်းဖြစ်ပါတယ်။) လူဆိုတဲ့ သင်္ခါရ သဘောတရား တစ်ခုကို စဉ်းစား ကြည့်ရအောင်။ လူဆိုတာ မွေးဖွါးသည်မှစ၍ မသေဆုံးမှီအတိုင်းအတာ အချိန်အတောအတွင်း က အသိညဏ်ရှိတဲ့ သတ္တ၀ါ တစ်မျိုးကို လူလို့ခေါ်တာပါ။ အသိညဏ်မရှိတဲ့ သတ္တ၀ါမျိုးကျတော့ တိရစ္ဆာန်လို့ ခေါ်ပါတယ်။ အခေါ်အဝေါ်သာ ကွဲပေမယ့် သင်္ခါရသဘောတရားကတော့ အတူတူပါပဲ။ လူဆိုတာ မွေးဖွါးတဲ့ အချိန် ကနေစပြိး စိတ်တွေရော၊ ရုပ်တွေ ရော ဘယ်အရာမှ တည်မြဲမှုမရှိပဲ အမြဲတမ်းပြောင်းလဲလို့နေပါတယ်။ စိတ်ရဲ့ ပြောင်းလဲမှုက အလွန်မြန်လွန်း တော့ သာမာန်လူသားတွေရဲ့ ညဏ်မျက်လုံးနဲ့မြင်နိုင်ဘို့ရာ မဖြစ်နိုင် ပါဘူး။
သို့သော်လည်း တစ်စုံတစ်ယောက်အပေါ်မှာ စိတ်ဆိုးနေတုန်း သူက ကိုယ့်ကို ချစ်ခင်နှစ်သက်ဖွယ် စကားလေးတွေ၊ ချစ်ခင်နှစ်သက်ဖွယ် အပြုအမူလေးတွေကို ပြုလုပ်ဆောင်ရွက်လိုက်တဲ့ အခါမှာ ချက်ခြင်းပဲ စောစောက ဆိုးနေတဲ့၊ သူ့အပေါ်မကောင်းမြင်နေတဲ့ စိတ်ကလေးတွေ ချက်ခြင်းပဲ ကောင်းတဲ့ဘက်ကို ကူး ပြောင်းသွားတတ်ပါတယ်။ ထိုကဲ့သို့သော အပေါ်ယံပြောင်းလဲမှု၊ မတည်မြဲမှုမျိုးကိုတော့ ပုထုဇဉ်တွေရဲ့ ညဏ်နဲ့၊ မျက်လုံးနဲ့ မြင်နိုင်ကြပါတယ်။ ထို့အတူပါပဲ၊ ခုပဲ-လှူမယ်လို့ စိတ်ကောင်း သဒ္ဓါတရားလေး ဖြစ်ပေါ်နေတုံး တစ်စုံ တစ်ယောက်က ဖျက်လို့ဖြစ်စေ၊ ကိုယ်ကိုယ်တိုင်က အကြောင်းအမျိုးကြောင့် ဖြစ်စေ၊ လှူချင်တဲ့စိလေးတွေ ပြောင်းလဲသွားတာမျိုး စတဲ့ စိတ်ရဲ့ မတည်မြဲမှုများစွာကိုလည်း အားလုံးပဲ မြင်နိုင်၊တွေ့နိုင်ကြပါတယ်။ ဒါက စိတ်ရဲ့ အပေါ်ယံ မတည်မြဲမှုကို ဆွေးနွေးပြတာပါ။ ဒီထက်နက်နဲတဲ့ စိတ်ရဲ့မတည်မြဲမှုတွေကိုတော့ “အဘိဓမ္မာ အဆင့် ရောက်တဲ့အခါ” သင်ကြားရပါလိမ့်မယ်။ စိတ်ရဲ့ မတည်မြဲမှုကို နည်းနည်းသဘောပေါက်ပြီဆိုရင် ရုပ်တွေ ရဲ့ မတည်မြဲမှု ပြောင်းလဲမှုတွေကို ဆက်ပြိးဆွေးနွေးကြည့်ရအောင်။ ရုပ်တွေရဲ့ အမြဲတမ်း တည်မြဲမှုမရှိပဲ ပြောင်း လဲ ဖြစ်ပျက်နေတာဟာ “အနိစ္စ”သဘောပါ။ လူရဲ့ ရုပ်သဘောကို ကြည့်လိုက်မယ်ဆိုရင် မွေးစကရုပ်နဲ့ ဆယ်နှစ် ၊ ဆယ့်တစ်နှစ်အရွယ်ကရုပ်ဟာ “လုံးဝ”တူညီမှုမရှိတော့ပါဘူး။ မွေးစက ပုံလေးကို ဓါတ်ပုံရိုက်ထား ပြီးတော့ ဆယ်နှစ်ဆယ့်တစ်နှစ်လောက်ကြာတဲ့အခါ ပြန်ကြည့်လိုက်ရင် မိဘကသာ ဒါဟာ“ကိုယ်”ပါလို့ မပြော ရင် ဘယ်လိုမှ မှတ်မိနိုင်စရာအကြောင်းမရှိပါဘူး။
ဒီလိုပါပဲ၊ ဆယ်နှစ်ဆယ့်တစ်နှစ်က ဓါတ်ပုံလေး ရိုက်ထား။ ဟော- အသက် ၇၀-၈၀ ရောက်တဲ့အခါ ပြန်ကြည့်“မိမိ” ပါလို့ မှတ်ထားတဲ့ သညာသာမရှိရင် ဒါဟာ-ကိုယ်ပါလို့ ဘယ်လိုမှ မပြောနိုင်ပါဘူး။ အဲဒိလို ပြောင်းလဲမှုတွေဟာ တစ်ခဏချင်း ၀ုန်းခနဲ၊ ဒိုင်းခနဲ ခုန်ကျော်ပြီးတော့ ပြောင်းလဲသွားတာ မဟုတ်ပါဘူး။ အမြဲတမ်း စက္ကန့်မလပ်၊ မိနစ်မလပ် ပြောင်းလဲနေတာပါ။ ပြောင်းလဲမှုဟာ ဘယ်လောက်အထိလည်းဆိုရင် အိပ်နေတဲ့ အချိန်မှာလဲ ဒိပြောင်းလဲမှု၊ မတည်မြဲမှုတွေဟာ ရပ်မနေပါဘူး။ ဆက်ပြီး ပြောင်းလဲ ပျက်ဆီးနေတာပါပဲ။ အကယ်၍များ လူဟာ မထပဲ အိပ်ယာထဲ တစ်ချိန်လုံးအိပ်နေမယ်ဆိုရင်လဲ အိုချိန်တန်ရင် အိုသွားမှာပါပဲ၊ နာချိန်တန်ရင် နာသွားမှာပါပဲ။ သေချိန်တန်တော့လည်း အိပ်နေတဲ့သူမို့ သေမင်းက ချမ်းသာပေးမှာ မဟုတ်ပါဘူး။ သေသွားမှာပါပဲ။ ဒါကြောင့် ဒီ-အနိစ္စသဘောဘယ်အချိန်ရပ်လဲ ဆိုရင် နိဗ္ဗာန်မရသမျှ ဘယ်အချိန်မှ မရပ်ဘူးလို့ပဲ ဖြေရမှာပါ။ လူတွေက သိပ်သမာဓိနည်းလွန်းတော့ အဲဒိလို ပြောင်းလဲမှုတွေကို မသိနိုင်ပါဘူး။ ၀ိပဿနာ တရားအားထုတ်လို့ သမာဓိအားတွေ ကောင်းလာတဲ့အခါမှာ အဲဒိလို ပြောင်းလဲနေတဲ့ စိတ်တွေ၊ မတည်မြဲတဲ့ ရုပ်တွေရဲ့ သဘောကို မြင်လာပါလိမ့်မယ်။ ဒါကြောင့် အကျဥ်းချုပ်အားဖြင့် အဲဒိလို စိတ်တွေ၊ ရုပ်တွေ စက္ကန့်မလပ်၊ မိနစ်မလပ် ပြောင်းလဲ၊ ဖြစ်ပျက်ပြိးတော့ မတည်မြဲတဲ့ သဘောတရားကိုပဲ “အနိစ္စ” မမြဲခြင်းလို့ ဟောကြားတော်မူတာ ဖြစ်ပါတယ်။
ု
(ဆောင်းပါး သိပ်ရှည်နေမည်ဆိုး၍ ဒုက္ခနှင့် အနတ္တသဘောကို နောက်ဆောင်းပါးတစ်ပုဒ်ဖြင့် ဆက်လက် ဆွေးနွေးပါမည်။)
“အားလုံး ဗုဒ္ဓတရားတော်နဲ့ ငြိမ်းချမ်းတဲ့ ဘ၀ကို တည်ဆောက်နိုင်ကြပါစေ”
အရှင်တေဇာနန္ဒ(စေတနာပန်းခင်း)
ကိုးကား=၁။ ဒေါက်တာ နန္ဒမာလာ-ဘ၀အသွင်ကို ဓမ္မအမြင်ဖြင့်ရှုကြည့်ခြင်း
၂။ ဒေါက်တာဝါပိုလ်လာရာဟုလာ-မြတ်ဗုဒ္ဓဒေသနာ(ဇေယျာမောင် ဦးကိုလေး ဘာသာပြန်)
၃။ မှတ်သားဖူးသော ဓမ္မစာပေများ။အရှင်တေဇာနန္ဒ(စေတနာပန်းခင်း)
ကိုးကား=၁။ ဒေါက်တာ နန္ဒမာလာ-ဘ၀အသွင်ကို ဓမ္မအမြင်ဖြင့်ရှုကြည့်ခြင်း
၂။ ဒေါက်တာဝါပိုလ်လာရာဟုလာ-မြတ်ဗုဒ္ဓဒေသနာ(ဇေယျာမောင် ဦးကိုလေး ဘာသာပြန်)
